WILLEMSTAD.- Djasabra último, durante un enkuentro na Hòfi Biesheuvel, músikonan, prensa, representantenan di negoshinan di Horeca i abitantenan, a interkambiá di pensamentu di un forma positivo, pa yega na solushonnan balansá ku por sirbi komo un base pa yega nan normanan  adaptá riba altura di zonido den futuro.
E diálogo  aki ta keda organisá, despues ku un komishon di AMAK a reuní  17 di yüli ku Minister di GMN  riba preokupashonnan, ku ta afektá un bon desaroyo den farándula i kultura en general na Kòrsou.
E reunion  menshoná a bai di un forma ameno i sinsero, i e Ministerio a  publiká  den un komunikado na prensa, tur e puntonan akordá.
Seguidamente e minister durante un konferensia di prensa, konhuntamente ku AMAK a duna un splikashon di e trayekto ku lo bai sigui, i den e kaso aki a anunsiá ku lo bai tin un diálogo demokrátiko, djasabra 18 di ougùstùs.
Direktiva kier gradisí tur e miembronan, ku a duna oido na e yamada pa asistí na e reunion di 15 di ougùstùs na Festival Center, i tur esnan ku a partisipá na e diálogo demokrátiko, djasabra 18 di ougùstùs na  Hòfi Biesheuvel, i ku nos por a yega na un resultado, ku nos ta satisfecho kuné.
Un palabra gradisimentu na e komishon organisadó i na srs. Gibi Doran, Ike Jessurun i Gregory Colina, ku a yuda nos den e trayekto aki.
Danki tambe na Minister Susan Camelia-Römer, srs. Axel Pikero i Alvin Daal i na Ministerio di Hustisia, MEO i Enseñansa i kultura i e komishon “Night Life”, ku huntu ku e komishon di AMAK  a traha duru, pa yega na e resultado final.
Nos ta spera, ku en bérdat  ku na prinsipio di sèptèmber, konseho di Minister por akordá e kambionan, ku a keda aseptá pa un mayoria.