WILLEMSTAD.- Riba inisiativa di dòkter di wowo i direktor di Caribbean Glaucoma Centre, Stephen Palm, e trio "Nos Otrobanda" lo duna un konsierto den Fortkerk riba 15 i 16 di yüni próksimo.
E trio forma pa Michiel Braam, piano; Aty de Windt, baho i Andre Groen resientemente a produsí i pone riba merkado un CD ku muzik di kompositornan di Otrobanda.
E CD tin e mesun nòmber ku e trio: "Nos Otrobanda". Nan a skohe pa e nòmber "Otrobanda" pasobra Otrobanda ta e kuna di nos wals, dansa, mazurka i tumba di Kòrsou.
Michiel Braam ta ‘hoofddocent’ na konservatorio na Arnhem, pianista i kompositor. E ta un di e mihó pianista di Jazz na Hulanda. Na 1997 el a haña e "Boy Edgar Award", ku ta e award mas importante na Hulanda pa músikonan di Jazz.
Algun aña pasá Michiel Braam a haña di su kasá un kasèt regalo ku muzik di Kòrsou toká dor di e konosido pianista i kompositor Edgar Palm (1905-1998). Michiel Braam a gosa e interpretashon i e muzik di Edgar Palm masha tantu. Esaki a bira e komienso di e trio "Nos Otrobanda" na Hulanda.
Karchi pa e konsierto ta optenibel na Boekhandel Mensing i na ‘Caribbean Glaucoma Centre’ na Kaya Jombi Mensing 33.