WILLEMSTAD.- Despues di e edishon sumamente eksitoso i komentá di aña pasá, Dibo D i Randal Corsen ta preparando pa nan siguiente edishon di “Mama Pa Semper”, E konsierto pa dia di mama! Meskos ku aña pasá, e konsierto lo tuma lugá riba Octagon Plaza na Avila Beach Hotel. E invitadonan spesial pa e edishon akí lo ta e legendario Mafalda Minguel, e kantantenan Kevin Carty i Tony Fernan, ku tabata forma e frònt di agrupashon musikal ‘Survival’, i e duo formá pa Url Isenia i Dandan, konosí di e mega hit ‘E lugá ku mi meresé’. E konsierto lo tuma lugá riba dia di mama, djadumingu 12 di mei i lo kuminsá 7 or di anochi.
Ultimo añanan e kombinashon remarkabel di e pianista, kompositor i areglista Randal Corsen i e kantante, outor di letra i kompositor Dibo Doran a demostrá di ta unu sumamente eksitoso. Asina e duo akí a produsí vários tema ku a kosechá éksito den nos farándula lokal, manera ‘Bo Wowonan’, ‘Dushi Sintimentu’, i mas resien ‘Biba Boy’. Tambe nan a saka kara di Kòrsou durante un konsierto eksitoso na Colombia, i nan tabatin un konsierto den duo “sold out” na Avila Beach Hotel. Banda di tur esaki, Dibo su koronashon komo Rei di Tumba e aña akí a resultá di ta otro éksito mas pa e kombinashon akí.
Pa e okashon akí, Randal Corsen group lo konsistí pa gran parti di e mesun músikonan ku a kompañá Dibo i Randal durante nan presentashon na Riohacha Colombia, luna pasá. Ta trata di un orkesta di 12 músiko lokal, un kombinashon di músikonan di taya i talentonan nobo. I pa kaba di koroná e obra, meskos ku aña pasá “Antillean String Quartet” lo “join” Randal Corsen group pa duna e totalidat musikal un toke diferente.
E programa lo konsistí di prinsipalmente temanan lokal, temanan dediká spesialmente na mamanan di tur edat, i algun tema original di Dibo i Randal. Banda di esei, e kombinashon di Kevin Carty i Tony Fernan lo trese e toke romántiko a la Survival. Url i Dandan lo presentá pa promé bia den kolaborashon ku Dibo i Randal, i doña Mafalda lo trese temanan klásiko pa asina tur hende por rekordá i disfrutá.
Djadumingu 12 di mei porta ta habri 6 or di anochi, i e konsierto ta kuminsá 7 or en punto! Karchinan ta optenibel na Mensing’s Caminada, Avila Beach hotel, 24 Uur Uit De Muur (pomp Sta. Maria) i Beep Beep (Rio Canario). “Early Birds” lo ta 50 florin i entrada general ta na balor di 55 florin. Aña pasá karchinan pa e konsierto aki a kaba lihé i hopi hende a keda afó, pues ta rekomendabel pa no warda muchu largu, i buska bo karchi pa “Mama Pa Semper”, E konsierto pa dia di mama!.