WILLEMSTAD.- Dick Advocaat a keda apuntá komo entrenadó di selekshon di Kòrsou den 2024. Bou di Advocaat selekshon nashonal a disputá sinku partido den stadion Ergilio Hato òf tambe yamá kariñosamente ‘Kueba di Pantera Negra’. Selekshon di Kòrsou a gana kada un di e weganan akí, anotando tres òf mas gol den kada unu. Den e sinku weganan akí Kòrsou a anotá 20 gol i a permití 4 gol.

Selekshon di Kòrsou den promé wega na kas bou di Advocaat, a gana di Barbados ku skor di 4-1. Despues a sigui viktoria di 5-0 riba Saint Martin den e ‘Kueba di Pantera Negra’.

Kòrsou a sigui ku dos viktoria siguí den Stadion Ergilio Hato kontra St. Lucia, ku skornan di 4-1 i 4-0 respektivamente.

Miéntras luna pasá selekshon di Kòrsou, a derotá Bermuda na kas ku skor di 3-2.

Promé ku Advocaat, selekshon di Kòrsou tabatin un racha di tres wega sin konosé derota den stadion Ergilio Hato.

Esaki ta nifiká ku selekshon di Kòrsou tin ocho wega siguí sin konosé derota den stadion Ergilio Hato.