WILLEMSTAD.- Despues di seis luna di negoshashon i yamadanan, beisbòl na New Zealand lo bai tin bishita di un dje mihó hungadónan hóben den liga grandi kual ta e kurasoleño Didi Gregorius. Didi ta planiá pa hasi su bishita na e pais dia 9 di yanüari próksimo.

Segun e CEO di e Baseball New Zealand, Ryan Flynn nan ta sumamente kontentu di por risibí bishita di un hungadó di taya ku ta bin di un di e merkadonan mas grandi ku ta New York i e ekipo di Yankees. El a sigui bisa ku Gregorius ta un parti integral di e ekipo aktualmente ku e yu di Kòrsou realmente a traha su nòmber den liga grandi.

Didi mes a indiká ku e ta ansioso pa yega e pais kual tabata un di su destinashonnan den futuro ya ku e gusta biaha i ku e no por warda pa eksperensiá e kultura i sera konosí ku hendenan einan. Tambe el a sigui bisa ku e ta spera di por trese mas atenshon i gana na hendenan di New Zealand pa gusta beisbòl i ku den futuro lo por mira algun dje muchanan hóben den liga grandi.

Didi lo bai tene diferente klínika ayanan den diferente estado. E pais a yega di risibí mas sosten di hungadónan profeshonal di MLB manera Mark Melancon, Nick Hundley i Paul Goldschmidt. E kurasoleño lo yega dia nuebe próksimo i dia 10 ku 11 lo e ta na Christchurch, pa despues e bai Wellington dia 15 i despues pasa su sobrá dianan na Auckland te ora e regresá dia 19 di yanüari.

Mundu Deportivo mester apuntá ku e tipo di gestonan aki a pone ku Didi a gana e premio Heart & Hustle Award di MLB pa e ekipo di Yankees i tabata un di e kandidatonan pa gana esun mes di Major League Baseball.