LA PAZ, BOLIVIA (AFP).- Gobièrnu di Bolivia a anunsiá detenshon di 17 persona, entre militarnan aktivo i retirá komo tambe vários sivil, pa nan vínkulo ku e gòlpi di estado frakasá kontra dje presidente iskierdista Luis Arce.
“A logra detenshon di un total di 17 persona pa a purba na tumba gobièrnu”, segun e minister di Interior, Eduardo del Castillo. Te ku djárason a detené e general Juan José Zúñiga i e vise almirante Juan Arnez, eks-komandante di Ehérsito, respektivamente, señalá di a enkabesá e intento.
Gobièrnu a presentá e otro 15 sòldánan ku mannan di bui, chaleko antibala i kustodiá pa efektivonan polisial.
“E kos aki a keda planiá for di luna di mei, segun Castillo, i a agregá ku polis ta buska otro tres militar penshoná kendenan tambe a forma parti dje konspirashon.
Segun Castillo, e plan pa tumba Arce tabata enkabesá pa Zúñiga i Arnez. Tur dos ofisial a keda akusá di lantamentu armá i terorismo, delitonan pa kua nan ta enfrentá un kastigu di te ku 20 aña di prizòn.
Entre e sivilnan detené ta figurá Anibal Aguilas, un eks vise minister di añanan 1980. “Ainda nos no a pone man riba tur esnan ku a tuma parti den e intento di gòlpi”, segun e minister, kende a pidi poblashon pa duna nan kontribushon dor di informá di paradero dje otro sospechosonan.
