PITTSBURGH, AP.- Un hòmber a kuminsá tira den un sinagoga na Pittsburgh djasabra. Esaki a kousa morto di 11 persona den un di e atakenan mas mortal kontra hudiunan den historia di Merka.
E agreshon di 20 minüt den Tree òf Life Congregation di besindario di Squirrel Hill a laga seis persona heridá, inkluyendo kuater polis ku a yega rápidamente na e sitio, segun indikashon di outoridat.
E sospechoso, Robert Bowers, a enkontrá su mes den un tiroteo ku polis i a haña vários bala. Bowers kende ta interná den hospital den kondishon stabil, a wòrdu akusá ku 29 kargo federal ku ta inkluí krímen di odio i delitonan ku arma.
E tiroteo aki ta yega meimei di un ola di atentado di perfil haltu den un pais kada biaha mas dividí, e siguiente dia ku un hòmber na Florida a wòrdu arestá i akusá di manda un serie di bòm via pòst. E bòmnan a wòrdu fabriká na kas i tabata destiná pa demókratanan i personanan ku ta kritiká e presidente merikano Donald Trump. Falta solamente un siman mas pa elekshon legislativo den Merka.
E bashamentu di bala a kousa un debate nashonal tokante arma. Presidente Donald Trump a bisa ku e desenlase por tabata diferente si e sinagoga tabata disponé di “protekshon”, ku seguridat arma.
