WILLEMSTAD.- Maestronan for di diferente parti di mundu ta na Kòrsou pa duna vários workshop, tur esaki relashoná ku Art Rules. Durante 2 siman lo enfoká riba arte, baile, teatro, músika, skibimentu kreativo i trahamentu di pelíkula. E hóbennan lo risibí lès dor di instruktornan profeshonal den kada área spesífiko.

Digicel ta kontentu un bes mas di por a kontribuí ku e proyekto aki. “Art Rules Curaçao ta kuadra perfektamente ku e liña di maneho di Digicel. E aña aki nos tabata ke involukrá e programa un poko mas den nos kompania; e kampaña ‘Rollover’ ta un bon okashon.

Nos ta sigur ku e 2 simannan di Art Rules lo ta yen di aprendisahe i ta deseá tur hóben hopi éksito”, esaki di akuerdo ku Jorge Cuartas di departamento di merkadeo pa Digicel Kòrsou.

E hóbennan di Art Rules lo forma parti di e kampaña ‘Rollover’ ku Digicel i lo presentá e kampaña den diferente forma; por menshoná un obra chikitu di teatro,  video i fotografia artístiko.  Lo por mira esakinan riba entre otro e Snapchat i Instagram di Digicel Kòrsou.

Un total di 120 hóben lo partisipá na e tayernan ku ta keda ofresé den Art Rules. E tayernan ta tumando lugá na Kura di Arte te ku 4 di ougùstùs 2017.

Na final di e 2 simannan lo tin un presentashon grandi na World Trade Center, na unda ku e hóbennan lo demostrá na pueblo di Kòrsou tur loke ku nan a siña. E presentashon aki ta tuma lugá riba djasabra, 5 di ougùstùs 2017.

Digicel ta spera ku e hóbennan lo disfrutá di nan partisipashon na Art Rules, pero mas ku tur kos pa despues nan sigui desaroyá nan talento den nan bario òf na skol. Pa mas informashon di e evento por bishitá e página di Facebook di Digicel www.facebook.com/DigicelCuracao òf riba Instagram di Digicel Curaçao.