WILLEMSTAD.- Preparashon ta tumando lugá pa presentá otro edishon di ‘Marcha Kultural di Banda Ariba 2017’, riba djadumingu 29 di òktober próksimo.
E evento bou di direkshon di Shurendi Pieternella e aña aki ta konta kaba ku partisipashon di 8 grupo di Seú, embahadornan di Karnaval i Seú, grupo di Wela Seú i mas.
Ta importante pa menshoná ku e evento ta habri i ku tur hende ku ke partisipá sea den grupo òf individual ta bon bini.
Salida di Marcha Kultural di Banda Ariba lo ta na Botika Mampuritu i ta terminá na Hòfi Sterke Yerke. Despues dje marcha lo sigui ku ‘Eksploshon Kultural’ den Hòfi. Pa esaki tin konfirmá kaba animashon di Kor Carmelitas, Grupo Sonrisa, Grupo Ruta, Aya i su Grupo, Zoyoyo, Los Originales i ERA ku Rei di Tumba, Amos Balentin. Entrada na Hòfi Sterke Yerke ta 15 florin pa persona.
Pa mas informashon relashoná ku partisipashon na ‘Marcha Kultural Banda Ariba 2017’  por tuma kontakto ku Ella Bernabela na 510-8319.