WILLEMSTAD.- Un dje eventonan ku pa fin dje aña aki tin tur ingrediente pa bai bira un ku anualmente lo tin di tuma lugá ta ‘Taste of Music 2017’.
Ku e meta pa trese un fushon entre e mundu di gastronomia i esun musikal a yega na e konsepto di ‘Taste of Music’ ku pa su promé edishon ta logra pa trese Kòrsou e gran músiko Venezolano Ilan Chester.
Ku su éksitonan manera ‘Palabras del Alma’, ‘Canto al Avila’, ‘Solo faltas tu’, ‘Marea de la Mar’ i e klásiko ‘Es Verdad’, Ilan Chester ketu bai ta un dje artistanan ku un atrakshon grandi unda ku e presentá, ehèmpel di esaki ta ora ku el a presentá durante di Curaçao North Sea Jazz Festival i a yena e sala di eksibishon di WTC te ku mester a sera porta.
Ilan ta pendiente pa e aña aki risibí e premio pa ‘Ekselensia Musikal’ di Latin Grammy Awards den luna di novèmber próksimo.
Huntu ku Ilan Chester lo tin presentashon di nos Randal Corsen i su Big Band i Junior Tecla kende resientemente tabatin un eksitoso presentashon ku su banda Roots Riders. Pa e okashon aki nos a komprondé ku Junior Tecla lo keda kompañá pa un banda konsistiendo di músikonan lokal.
‘Taste of Music 2017’ lo tuma lugá dia 2 di desèmber na Lanthuis Chobolobo. Keda pendiente pa mas informashon relashoná ku e evento aki.