WILLEMSTAD.- Resientemente Chanelle de Lau a representá Kòrsou na e sertámen di Miss International 2017 ku a tuma lugá na Hapon.
Den e sertámen aki, Chanelle a keda skohé komo e promé finalista di Miss International 2017, entre 79 damita masha bunita.
Chanelle a sa di representá Kòrsou dignamente i durante henter e sertámen a profilá komo un dje faboritonan den e tòp 5.
Djasabra awor, 25 di novèmber 2017, Chanelle de Lau ta yega Kòrsou ku e buelo di American Airlines pa 4.30 di atardi.
Fundashon Chanelle de Lau ta invitá bo pa tei na e okashon ariba menshoná.
Lo tin un karavana ku lo sali for di èrpòrt pa 17:00, kual lo subi Rooseveltweg, lora na man robes na krusada di Rooseveltweg/ Winston Churchillweg, lora na man drechi krusada Winston Churchillweg/ Cubaweg, lora na final di Cubaweg/ krusada Rooseveltweg i finalisá na “Holiday Occasions by Roosevelt Center”.
Den e karavana aki Chanelle lo ta riba karosa pa saludá pueblo di Kòrsou, kompañá pa otro reinanan i invitadonan.
E parti ofisial lo tuma lugá na “Holiday Occasions by Roosevelt Center” i ta kuminsá alrededor di 7’or di anochi. Lo tin un tremendo show ku artistanan invitá manera: Ebony Albertus, Rashid Felida i Amos Balentien. Gruponan di baile FAC i Explotion Dancers tambe lo tei. Lo sera e anochi aki ku un bunita show di klapchi.
Pueblo di Kòrsou ta bon biní pa asina risibí nos digno representante, tantu na èrpòrt, kantu di kaminda i na “Holiday Occasions”.