FRANSIA.- Amigunan di Whitney Houston ta alegá ku e kantante a keda abusá seksualmente pa su prima Dee Dee Warwick, ora e tabata menor di edat, den un dokumental ku a keda estrená ayera den e Festival di Sine di Cannes.
Mary Jones, keda pa algun aña tabata e asistente di Houston, a bisa e sineasta Kevin Macdonald ku e kantante difuntu a bis’é ku Warwick, e ruman muhé di Dionne Warwick, a abusá di dje ora e tabata chikí. E ruman hòmber di Houson, Gary Garland-Houston, tambe a deklará ku un miembro di su famia a abusá di dje ora e tabatin 7 i 9 aña.
Dee Dee Warwick, kende na bida tabatin 18 aña mas grandi ku Houston, a fayesé na 2008.
Tur e komentarionan aki ku a keda revelá den e dokumental ‘Whitney’, realisá ku kolaborashon di famia Houston, ta bolbe pone lus riba e bida turbulento di e superstrea.
Jones ta alegá ku e eksperensia a pone Houston kuestioná su propio seksualidat i a kontribuí na su problemanan ku droga na final di su bida.
Manera ta konosí e kantante a muri hoga na 2012 ku 48 aña den un ‘badkuip’ di un hotèl.
‘Whitney’ ku su estreno komersial lo ta dia 7 di yüli próksimo ta sugerí ku e supuesto insidentenan di abusu kontra dje kantante a tuma lugá miéntras ku Cissy Houston, mama di Whitney, tabata riba gira. Cissy tabata na kabes di un grupo di kanto gospel ‘The Drinkard Sisters’.