Update Minister: E preis aktual no ta esun di mas haltu

WILLEMSTAD.-Kennedy Vrutaal ta satisfecho ku kontestanan ku minister Steven Martina a duna na entrada di Punda. Punto importante ku minister Martina a splika e grupo ta ku e tarifa aktual ta ferfelu, pero e no ta esun mas haltu den historia. Vrutaal ta enfatisá ku e gasoil ta seka i kaba lihé i p’esei ta importante pa nan a haña e spesifikashon di e produkto pa laga analisá e kalidat.

Minister Martina a splika e grupo di ekipo pisá ku resientemente a anunsiá oumentu di 22 sèn riba preis di kombustibel, pero e mester dòbel chek si bèrdat a implementá esaki. E mandatario a splika tambe ku e 22 sèn di oumentu su meta ta pa yuda krea un fondo di Kòrsou mes. Despues di Covid-19 Kòrsou a konosé situashonnan difísil kaminda entrada di gobièrnu a kai i banda di esei a surgi hopi hende ku a pèrdè trabou i negoshinan a sera. E 22 sèn hustamente mester a yuda pasobra e sèn ku ta haña for di Ulanda no ta sufisiente. Ora gobièrnu tuma desishon e mester tuma desishon basá riba maneho responsabel. Den kaso di Covid i su konsekuensianan esei ta desishon basá riba maneho responsabel.

Minister Martina a splika ku no por mishi ku márgen di Curoil ni di e pòmpnan pasobra no tin sirkunstansia di tal forma ku ta permití pa bai mishi den e márgennan ei i kita for di prosedura normal. Ademas mester warda konseho di e direktorado di asuntunan hurídiko di gobièrnu (WJZ).

Kennedy Vrutaal i su grupo a bisa na final ku nan ta satisfecho pasobra hinter komunidat por a skucha kiko minister Martina a splika. Vrutaal a pidi minister Martina pa no tuma represaya kontra e i su koleganan. Minister Martina a bisa ku e ta respetá e derecho di manifestashon pero e ta konstatá ku a violá órden públiko, pero e ta hasi un petishon na polis pa no tuma akshon kontra di esnan ku a violá órden públiko ku nan akshon. Semper su porta ta keda habrí pa sigui deliberá. Pa loke ta trata e parti di Solidaridat minister Martina a bisa ku Curoil a prefinansiá 60 mion florin kaba, pues a disidí e tempu ei ku no a pasa tur e gastunan pa komunidat, pero Curoil no por sigui prefinansiá mas.

Doñonan ekipo pisá eksigiendo redukshon márgen

Eksigensia pa minister Martina bai Punda

WILLEMSTAD.- Trùknan grandi i otro ekipo pisá a blòkia entrada di Punda. Di e forma aki ta blòkia tur tráfiko pa drenta Punda. Lider di e grupo aki sr. Kennedy Vrutaal a splika prensa ku nan no ta move for di e sitio. E grupo aki ta eksigiendo pa minister di Desaroyo Ekonómiko Steven Martina bai Punda i mira grandura di e tanki di kada un di e trùknan pa e realisá kon grandi e impakto di e oumentu di diesel ta pa e doñonan di e trùknan aki.

Siman pasá e grupo a sinta na mesa ku Curoil, Bureau Telecommunicatie en Post i otronan pa asina presentá nan preokupashonnan. A indiká ku ta duna e kompanianan di gobièrnu te e siman aki pa bini kontesta riba proposishon ku e grupo a presentá. Te ainda nan no a haña kontesta i komo tal nan a disidí di kuminsá pone preshon.

Vrutaal a bisa ku nan ta proponé pa laga Curoil i doñonan di pòmp di gasolin kòrta den nan márgen di ganashi komo sosten na komunidat pa karga ku e oumentu grandi riba kombustibel i prinsipalmente diesel. E grupo ta haña ku e oumentu ta inhustu pasobra no a tene kuenta ku su impakto.

Un di dos proposishon ta pa e grupo haña spesifikashon di e kalidat di e gasoil pasobra na nan opinion e gasoil no ta bon. E grupo ta dispuesto pa keda na e sitio, blòkia entrada di Punda te ora minister Martina presentá pa atendé ku e situashon ku a surgi. Vrutaal a duna di konosé ku tin trùknan na otro sitionan stratégiko di Kòrsou i ta dependé kon e situashon sigui ku e diesel den e trùknan ei tambe ta keda para mei mei di kaminda.

Minister Martina a manda mensahe pa sr. Vrutaal pa bai stashoná na Waaigat i einan ta bai papia ku nan, pero Vrutaal ta bisa ku ta difísil pasobra no tin sufisiente gasoil. Vrutaal ta bisa ku a hasi petishon pa manifestashon i esei nan a hasi.