MERKA.- Pa promé biaha ku Drake ta rekonosé ku e tin un yu hòmber. Riba su albùm nobo titulá ‘Scorpion’ ku a keda lansá ayera, e rapper kanades ta rap riba mucha.
Den dos kansion e ta rap riba su kargo komo tata. E ta kanta riba su emoshonnan ku el a hañ’é aden, despues ku e aktris franses di porno, Sophie Brussaux a informe ku tin un yu na kaminda for di nan relashon. Komentario i spekulashon relashoná ku esaki tabata hopi, pero e kantante di 31 aña no a papia nunka riba esaki.
‘Mi no a skonde mi yu pa mundu, pero mi a skonde mundu pa mi yu’, asina e ta rap den e kansion ‘Emotionless’. Mas aleu den e albùm bo por tende ku su yu, Adonis, a nase dia 11 di òktober 2017 i ku ta únikamente 1 biaha el a mir’é pa Pasku di Nasementu.
Rumornan riba e yu hòmber a kuminsá na inisio di 2017 despues ku e rapper a keda mirá ku Sophie. Tres luna despues Sophie ta konta na e portal TMZ ku e ta na estado di e rapper. Drake a ninga esaki.
Luna pasá e informashon a bolbe bin na diskushon na momentu ku e rapper ‘Pusha T’ a rap riba Adonis i ku Drake lo ta tené skondí.
Djaweps último Drake a hasi e ‘tracklist’ di su albùm nobo konosí, kaminda entre otro bo por tende stèm di Jay-Z i Michael Jackson.