MERKA.- Drake ta e artista ku mundialmente tin mas ‘streams’ riba Spotify den e periodo di 2010 te ku 2019. E kansionnan di e rapper kanadiense a keda skuchá den e periodo ei pa mas ku 28 miar di biaha riba e plataforma musikal, esei ta loke ta resaltá riba un reportahe ku Spotify a publiká djamars último.
E kanta-outor, Ed Sheeran i e rapper Post Malone ta konformá huntu ku Drake e tòp 3. Kantante Ariana Grande ta riba di kuater puesto i ta e artista di sekso femenino ku mas ‘stream’ i Eminem ta na di 5 lugá.
Post Malone ta e artista ku mas ‘stream’ den 2019. Su produkshonnan musikal tin mas ku 6.5 miar di streams riba Spotify, ku mundialmente ta konta ku 248 mion usuario.
‘Shape of You’ di Ed Sheeran ku 2.3 miar di ‘streams’ ta kansion mas skucha mundialmente entre 2010 i 2019.
E duo ku su produkshon musikal a keda mas skucha den 2019 ta Camila Cabello i Shawn Mendes ku a logra mas ku 1 miar di ‘streams’ ku e komposishon ‘Señorita’.