WILLEMSTAD.- Un tempu tur hende tabata biba felis den Punda. Pero riba un dia e Rei bieu a fayesé i tur poder a bin kai den man di tres minister astuto.
E hóben Kayo a disidí ku e ke bira Rei pa yuda su pueblo. Esaki ta mas fásil pa bisa ku logra.
Dies mucha for di Koraal Specht ta duna den e siman aki di 12 pa 15 di desèmber, 7 presentashon di ‘Kayo Rei di Punda’. Drazans durante dje último lunanan a prepará un presentashon na papiamentu ku muchanan di e skol di fundeshi ‘J.W. Th. Schotborghschool’.
E obra ta kontené algun tema ku ta aplikabel pa yòn i bieu. Den e obra aki e públiko ta wòrdu hibá den un Punda imaginario kaminda e Ministernan ta goberná. Kayo ta risibí di nan 6 tarea ku e mester kumpli kuné pa bor bira Rei. E ministernan ta hasi todo por todo pa hasi e posibilidat di Kayo mas difísil posibel. Kayo ke entrega pero ta siña ku si e perseverá e por logra hopi. Kayo lo logra pa bringa te na final pa su pueblo?
Drazans ta kere den e proyekto i ya pa tres aña ta dunando lèsnan di teatro na J.W.Th. Schotborghschool na Koraal Specht.  E aña aki a skohe 10 hóben di ‘Grupo 7’ pa hasi un presentashon.
Michelle Thielman, regisor teatral, tabata e persona enkargá pa duna guia na e hóbennan.
Mas o ménos 400 hóben e siman aki lo por mira e presentashon di ‘Kayo Rei di Punda’.
Awe, djárason 13 di desèmber 2017, e hóbennan lo duna un presentashon grátis pa tur hende ku ke mira e obra teatral. E presentashon di awe nochi lo kuminsá pa 7’or di anochi na Sentro di Bario Koraal Specht. Ku e presentashon aki e hóbennan ta risibí e oportunidat pa hasi nan presentashon dilanti di famia i hendenan di bario di Koraal Specht. Banda di e presentashon di e obra, ‘J.W. Th. Schotborghschool’ ta organisá algun aktividat kultural i lo tin benta di ko’i bebe i kome.