WILLEMSTAD.- Durante dje último lunanan Drazans a traha riba un obra teatral na Papiamentu titulá ‘Respect!’. Spesialmente pa e klasnan mas haltu di enseñansa di fundeshi a krea un proyekto teatral ku e tema aki. E ta alabes e promé presentashon teatral di Drazans pa 2019. 10 aktor entre 11 pa 19 aña di e skol di teatro hubenil a keda eduká segun e método di ‘Forumtheater’ i nan ta interpretá esenanan pa e públiko hóben relashoná ku e tema. Parti dje presentashon ta konta ku aporte di regisornan, parti for di eksperensia propio i tambe kuentanan ku e hóben aktornan mes a presentá. Drazans pa algun aña semanalmente ta duna lès di teatro i baile na 600 hóben ku ta bishitá skolnan den barionan vulnerabel di Kòrsou. Spesífikamente na skolnan den e barionan di Barber te ku Koraal Specht lo presentá e obra na diferente okashon grátis. Guus de Sain i Nadien Tigchelaar, ámbos dosentenan di teatro ‘freelance’ i regisor di Drazans a desaroyá e obra huntu ku e aktornan hóben di Drazans. Presentashonnan lo tuma lugá entrante awe na St. Antonius College na Sta. Maria, mañan djárason, 20 di mart 2019 na Kolegio San Hose na Barber; djaweps, 21 di mart 2019 na Kolegio San Dominico na Montaña Rey i djabièrnè, 22 di mart 2019 na Schotborgh School na Koraal Specht.