WILLEMSTAD.- Url Isenia, ta next pa Dreams! Dos siman pasá a lansa e vershon bibu di ‘Move’ feat. Dan Dan i awe ta dia pa e promoshonal di Url.
Fanátikonan di Dreams ta gustando e swing di e kantantenan, esaki por nota na interes riba retnan sosial i e petishon konstante na radio.
Di akuerdo ku maneho di Dreams, nan ta hasiendo pasonan konkreto. E konsepto Dreams ‘starring...’ ta moviendo bon i tin fanátikonan entusiasmá. E vershon bibu “Mi Stimabo...” di Url Isenia a keda mesklá dor di Efrem Mambi ku a dun’é e sabor di Dreams.
Dia 28 di yüli benidero Dreams tin un kompromiso serio; lo presentá Qshans den frontline di e banda pa un anochi kantando tur su éksitonan. Dreams ta ketu bai den studio di grabashon ya ku tin mas piesa nobo na kaminda.
Awe, fanátikonan di Url Isenia i Dreams tin otro piesa dushi pa skucha i disfrutá. Solisit’é na bo radio preferí i keda pendiente pa mas kos nobo. Por sigui Dreams riba nan página di Facebook i nan Instagram.