WILLEMSTAD.- Despues di un tempu di reorganisashon agrupashon musikal Dreams ta kla pa sigui deleitá pueblo di Kòrsou ku mas bon músika. Parti di e reorganisashon ta lansamentu di un logo nobo. Axel Pikero ta di opinion ku awor rumbo pa 7 aña di eksistensia ta bon momentu pa un “face lift”.

Despues di hopi petishon pa Dreams toka den klupnan nokturno di tamaño mas chikí, Dreams a opta pa lansa un konsepto ku ta fet e tipo di establesimentunan aki. Segun Axel Pikero ta splika ku e nivel musikal lo ta igual ku un i tur a kustumbrá di Dreams pero lo ta ménos na músiko físikamente riba esenario.

Teknologia a inspirá Axel pa uza entre otro “Ableton” den e konsepto aki ku porsierto ta un software ku entre otro Juan Luis Guerra ta uza den su shownan pa sinkronisá e aspektonan visual huntu ku audio. Den front lo tin Tico Libiee, Remy Joss i tambe Adjatay i nan lo ke kompaña pa Axel Pikero riba piano, Seebert Leito riba konga, Layo Virginie riba drùms i Kevin D’abreu riba bas.

Kuminsando djabièrnè awor 7 di yüli, e konsepto nobo aki lo toka pa promé biaha den e happy hour di Fusions, na momentu ku Highway Band lo ta tuma un luna di vakashon.

Di otro banda Axel Pikero ta forma un mini big band ku Dreams. E konsepto aki lo keda apliká na momentonan ku e banda lo tin ku profilá den konsierto, tokánan internashonal òf den kombinashonnan ku otro banda grandi. Axel Pikero a splika ku Dreams semper ta graba ku brass di 4 persona, pero pa skarsedat di músiko, ta toka live ku 2 trompetista so.

Pero danki na nòmbernan pisa den mundu di brass aki na Kòrsou manera Igort Rivas i Hector Sampson, Dreams lo ta profilando ku un brass di taya. Tambe Axel a agregá e tremendo kitarista ku ta Mark Kross den e tim, pues Axel ta enrikesé e nivel musikal di Dreams na un manera ku sigur baidónan di fiesta lo bai gusta.

Por último Dreams ta lansa su promé sensio riba merkado pa 2017. Den bos di Adjatay, Axel ta hasi reprodukshon di un tema titulá “Lag’e”. Ya kaba e ta zonando na tur radio emisora I tambe ta por hañ’é riba medionan sosial tambe.