WILLEMSTAD.- Dreams ta lansa su Road Bang 2019 spesialmente pa e temporada di karnaval. Atraves di añanan Dreams a demostrá di ta un di e agrupashonnan musikal mas dinámiko i inovativo den temporada di karnaval.
Tantu ku nan partisipashon nan eksitoso den festival di tumba i tambe e ambiente ku nan ta desplegá den kayanan di Otrobanda durante marchanan. Hitnan klásiko manera, Danza Coduro, Zeta lomba, Den mi asuntu i e RoadBang 2017 ku partisipashon di Lady Lava, ta zona ku bon frekuensia te ku dia di awe.
E aña aki no ta un eksepshon, Axel Pikero semper ta pèrkurá pa ta masha kreativo i buta artistanan riba un plano mas haltu den nan karera musikal manera a sosodé ku por ehèmpel Lady Lava. Despues di su kolaborashon ku Dreams, e ta gosa di un popularidat enorme den e género di karnaval i bon ambiente.
Na e okashon aki, un biaha mas Axel ta pèrkurá pa traha ku karanan nobo o deskonosí pa ku karnaval. Ku lansamentu di di e Road Bang 2019, Dreams ta introdusí MC Oye, Gody, i Encho. Igmar Lareine tambe ta forma parti di e produkshon pero no ta un deskonosí.
For di ayera e Road Bang 2019 ta zonando na tur radio emisora lokal i plataformanan di media sosial. Dreams lo kompañá e gruponan Estreno mas Pikete i Hats Off To Dreams den Gran Marcha.