WILLEMSTAD- Farándula ta kayente aki na Kòrsou i tin yen moveshon ta pasa tur ora. Kambionan ku ta tuma lugá di músikonan ku ta drenta otro banda ta masha komun i koriente. Aki aya tin interesnan tambe riba sierto bon músikonan ku ta den moveshon.

Un di e bon drùmernan ku tin aktualmente den farándula ta e drùmer di e agrupashon musikal Dreams kende ta Luigino “Gino” Virginie. Gino den pasado a militá ku e banda di Dibo D kual ta GMO pa despues e toka komo free lance ku ERA i tambe GIO. Tambe Gino a forma parti di Q-Sign hustamente den e último añanan di e banda aki.

Mas despues tabata Axel Pikero ku a buska Gino pa forma parti di DREAMS kual banda e tin basta aña ta tokando kuné. Den Bembe a tuma nota ku gerente di e banda Vega tabata buskando un drùmer i pa basta tempu e tabata hiba kombersashonnan ku Gino pa mira si e lo ke pasa pa forma parti di  su banda.

Gino a keda di pensa pero nunka a kaba di pensa i e kaso aki tabata birando demasiado largu. Gino no a hap riba un oferta ku a bin pe i a preferá di keda kaminda e ta. Ora ku esaki no a bira faktibel e gerente di Vega a bai pa su plan B kaminda despues di a sinta na mesa i deliberá ku e drùmer di Dolce band kende ta Yarzinho Tielman, ku si a disidí na bai guera ku Vega, mirando e oferta ku el a haña.

E drùmer Yarzinho Tielman ya ta moviendo ku Vega, miéntras Dolce band aworakí tin un drùmer nobo den persona di Rodiënne Genaro.