WILLEMSTAD.- ‘Thanksgiving’ no ta wòrdu selebrá hopi aki na Kòrsou i pa e motibu aki e organisashon Priceless Moment ta trese e konsepto aki den forma di un konsierto pa por konsientisá un i tur ku semper bo mester ta agradesido.
No opstante e situashon ku bo ta pasando aden semper keda positivo i ta agradesido. “Look at the bright side of things” i saka e mihó for di dje, esaki den famia, amistat, kompania etc. ‘Thanksgiving’ no tin diferensia den rasa, kredo, religion i òf koló.
Priceless Moment por a hasi e konsierto aki posibel danki na “Dennis Aalse Big Band” i “Team Quality Sound”  i e kantantenan Yumaira Grijt i Heinrich “Rich” Pieter. Pa e chèri riba e bolo lo tin un artista internashonal huntu ku nos artistanan lokal riba tarima “Tony Succar” ku ta nominá pa ‘Latin Grammy Award – Best Tropical Song’ ku e kansion “Me Enamoro Mas De Ti”.
Tony Succar ta un produktor, multi-instrumentalista, kompositor/areglista ku a kuminsá na un edat relativamente tempran den su bida den e mundu artístiko. Tony a nase na Lima, Perú, i wòrdu lanta na Miami, Florida. Tony su inspirashon di músika ta salsa, jazz, pop i afro-latino.
Tony Succar su álbum mas resien “Unity - The Latin Tribute to Michael Jackson” a resultá un tremendo éksito, alkansando Billboard’s #1 Tropical Album Music Chart, iTunes #1 World Latin Chart, i Amazon's #1 Latin Pop Music chart pa menshoná un par.
Succar ta i a traha ku diferente artista manera Tito Nieves, India, Jon Secada, Marc Anthony, Sheila E., Arturo Sandoval, Judith Hill, Obie Bermudez i diferente otro artista mas.
Karchinan ta na benta na Tik Tak, Mensing i 24 uur uit de muur i tambe na Priceless yamando 527-1635. Karchinan ta inkluí 1 wèlkòm drink i un pasaboka. Por kumpra kos di bebe na e bar henter anochi. Lo hasi un donashon na un instansia ku lo por hasi bon uso di  esaki.