ZOETERMEER, ULANDA.- Dos hóben yu di Kòrsou, djadumingu último a sorprendé polis di Zoetermeer di un forma grato. Polisnan a keda impreshoná ku e dos hóbennan Kerven i Curtrick, ku asta nan a pone un grabashon riba e página di Facebook di Polis di Zoetermeer.
Tabata djadumingu dia 9 di yüli último ku dos agente Polisial riba baiskel tabata patruyá den e parke na Oosterheem na Zoetermeer, ora ku nan a mira e dos hóbennan yu di Kòrsou. Normalmente polis sa haña reklamo di hóbennan ku ta aglomerá den e parke i hopi biaha nan ta kousa molèster na otronan. Pero e biaha aki esei no tabata e kaso, asina polisnan mes ta skibi riba nan página di Facebook.
E agentenan polisial a yega serka, p’asina tuma nota kiko tabata tumando lugá. Ora nan a papia ku e hóbennan, nan a bin komprondé ku tantu Kerven Dammers di 22 aña di edat komo su primu Curtrick van Rhee di 16 aña di edat tin afinidat musikal. Nan tabata trein un kantika ku nan mes a komponé.
Polis a duna nan oportunidat pa por a kanta i rèp e kansion  ku ta hiba di título “Wijzes”. Esaki a kai hopi na agrado di tantu e agentenan polisial komo tambe di tur esnan ku tabata presente den e parke. Tantu polis komo esnan ku tabata den e parke a saka potrèt i tambe a filma e presentashon dje dos hóbennan yu di Kòrsou.
Despues ku polis a pone e grabashon riba Facebook, nan a haña míles di “Like” den un tempu hopi kòrtiku.
DEN E BEMBE a logra sostené un entrevista breve ku e hóben Kerven Dammers, kende a splika ku tantu su primu komo e ta gusta músika. E ta kere ku hasiendo uso di músika, nan por kontribuí den hasi otro hende felis.
Pa loke ta e kansion “Wijzes”, Kerven a splika ku el a skibi e kansion aki pa su frei, tempu ku ainda e tabata biba na Kòrsou. Ta trata di un mucha muhé ku ta biba leu i ku e lo kier a drei mundu, p’asina por tabata serka dje.
Kerven aktualmente ta studiando “Molecular Science Technology”. Den pasado tambe Kerven a komponé algun kansion mas, manera entre otro “Geen stress”. Pa e grabashon dje video di polis riba Facebook, por hasi uso dje link:https://www.facebook.com/1735832356644171/videos/2300884713472263/
Tambe por haña e kansion “Wijzes” riba Youtube: KervenD – Geen stress òf via Instagram: @kervend_music. Dje forma aki, e dos hóbennan yu di Kòrsou aki kier kontagiá otro hóbennan pa hasi kosnan positivo tantu na Kòrsou komo na Ulanda.