PUERTO RICO.- E kansion ‘Dura’ di e artista portorikeño, Daddy Yankee, a alkansá e sertifikashon máksimo ku e Asosashon di Industria Diskográfiko di Merka, RIAA, na momentu ku el a logra disko di Oro, Platino i multiplatino pa reprodukshonnan digital riba e merkado Merikano.
E rekonosementu aki ta reflehá e ‘benta mionario/ streaming’ di ‘Dura’, esaki for di su lansamentu den luna di yanüari 2018 ta konta ku mas di 1000 mion ‘views’ riba su kanal di YouTube, asina su ofisina di relashon públiko i representashon di e artista a informá den un komunikado.
‘Semper ma reta mi mes, ‘Dura’ a duna mi e oportunidat pa rekonfirmá ku e reto di dia pa dia ta e éksito. Mi ta gradisí mi fanátikonan pa nan sosten, mi ta emoshoná ora mi mira kon bosnan a kombertí e kansion aki den un fenómeno. Danki, esei ta e palabra ku mas mihó ta deskribí mi sentimentunan’, asina e artista a ekspresá segun e komunikado.
Riba plataformanan digital, ‘Dura’ a surpasá 2 mil mion ‘streaming’, ademas di okupá e promé posishon den benta na Mexico, Spaña, Argentina, Chile, Peru, Puerto Rico, Brasil, Colombia, Ecuador i Panama. ‘Dura’ a alkansá tripel disko platino na Spaña, Chile, Argentina i Colombia.
Nombra komo un dje hispanonan mas influyente di mundu pa tantu CNN komo e prestigioso revista Time, e artista a bende mas di 17 mion albùm i tin mas di 60 mion siguidó riba su retnan sosial.