MERKA,.- Un par di kèts ‘Nike Air Yeezy 1’ bistí pa su kreadó, e rèper Kanye West, a keda kumprá pa 1.8 mion dòler durante di un subasta ku a keda organisá pa e empresa spesialisá den subasta, Sotheby’s.

E rèkòrt pa un par di kèts deportivo te ku promé ke subasta tabata pa un par di Air Jordan 1 di Nike, ku a keda bendé pa 615 mil dòler durante di un subasta dje empresa Christie’s den 2020.

E rèkòrt awor ta pa un par di kèts deportivo pretu di Kanye West, un modèl úniko. Ta e promé modèl di Yeezy ku a keda presentá públikamente durante di Grammy Awards 2008. E tabata un modelo ku despues a keda desaroyá i a keda poné na benta den luna di aprel 2009.

Segun analistanan dje empresa finansiero Cowen, e merkado di benta di kètsnan di kolekshon por representá 30 mil mion di dòler pa 2030.