WILLEMSTAD.- Dushi Aventura ayera nochi kompañá pa un públiko bastante animá a presentá nan disfras 2019 ku e tema “ Bo máskara a kai...”. Un diseño di Albertico Sambo, unda grupo a sa di hinka un fantasia kaminda e maskarada ta sentral.
Dushi Aventura a  mantené e mesun konsepto ku e la kuminsá kuné 8 aña pasá, kual ta pa ekspresá arte i tambe e obra di man ku ta hasi kada trahe di Dushi Aventura algu úniko.
Grupo Dushi Aventura ta bai karnaval ku un kantidat di no mas ku 250 partisipante, pe motibu ku kada trahe ta eksihí su tempu pa por traha i elaborá ariba, pero tambe paso e grupo ta kere ku e partisipante nan mester tin nan espasio pa por desfilá i modelá nan trahe sin mester keda primi riba otro.
Si  bo ta sinti ku esaki ta algu pa bo, lo bo por inskribí bo mes pa biba e dushi aventura ku e grupo tin pa ofresé.
Ta bai tin diferente tipo di trahe kual nan ta wòrdu kategorisá den diferente tipo di metal kuminsando ku Silver kual a ser modelá riba Gomezplein, sigui pa Gold (sekshon general ), Platinum i tambe Rhodium.
E grupo lo bai kompaña pa e kombinashon di Dj Plem i Rhyddm Band, un bon kombinashon pesnan ku gusta DJ i p’esnan ku gusta banda lo por disfrutá di tur dos .
Pa mas informashon di e tema por like e página di facebook: Dushi Aventura Carnival Group i risibí tur informashon ku ta relevante pa e grupo di karnaval.
Pa inskripshon lo por tuma kontakto ku e lidernan via telefòn: 540-5617, 515-0933, 520-8089 i pa Ulanda 31650812093.
No tarda pasó tin límite di partisipante i tambe di tempu, esaki pa garantisá ku tur  kos ta kaba na tempu i tambe ku lo bo tin un partisipashon tremendo den nos gran Marcha dia 3 i 5 di mart 2019. “Join Dushi Aventura and be part of the excitement!”.