WILLEMSTAD.- Randal Corsen Orchestra a presentá ‘Dushi Sentimentu’ ayera i mesora a kapta nos atenshon. E komposishon di Dibo D ku melodia di Randal Corsen i Dibo D i areglo di Randal Corsen ta un super produkshon.
Serio!, bunita letra, dushi melodia i un areglo nèchi ta pone bo oreanan tambe sinti e ‘Dushi Sentimentu’.
‘ Hesta un stimashon sin final mané laman, den universo bo ta e strea ku ta bria den mi kurason. Ta nos tur tin un persona, ku ta yena nos bida, ku ta dòrna nos mundu, ku pashon i koló’, parti dje letranan dje komposishon ‘Dushi Sentimentu’.
Produsí pa Dibo D, Oscar Bor i Randal Corsen e piesa a keda graba i di ‘master’ pa Oscar Bor.
Músikonan ku a kontribuí pa e grabashon aki ta Igort Rivas riba Flugelhorns, Jorge Dobal riba Trombon, Randal Corsen riba piano i keys; Ulrich de Jesus riba kitara; Eric Calmes riba bas; Pernell Saturnion riba konga, Udu i perkushon chikí; Ernie Gregorius riba timbal i kampana i Marlon ‘Lonte’ Conradus riba drùmsèt. Koro tabata na enkargo di Yumarya Grijt, Rich Pieter i Royston Hato.
Nos artistanan lokal ta demostrando klase den nan produkshonnan musikal, ban sigui sostené nan pa nan sigui brinda nos muzik na nivel!.