WILLEMSTAD.- Ayera tardi Minister Sra. Suzy Camelia-Römer a tene un rueda di prensa kaminda e minister huntu ku AMAK a duna informashon relashoná ku e proseso pa yega na un maneho struktural pa molèster di zonido. AMAK tabatin un manifestashon prepará pa tuma lugá ayera tardi pero esaki a keda kanselá despues di ku a tuma lugá un reunion entre e asosashon di músiko i Minister Camelia-Römer kende ta enkargá ku e ministerio di Salú, Medio Ambiente i Naturalesa. Minister Camelia-Römer a duna un splikashon amplio riba e ‘nota di maneho’ ku tin aktualmente kaminda e kantidat di desibèl ta repartí den dos parti, esun di 7’or di mainta pa 7’or di anochi i e otro di 7’or di anochi pa 7’or di mainta. Riba esaki e minister a indiká ku tin un proposishon di ‘Komishon Nightlife’ pa adaptá e nota di maneho di zonido máksimo. Konforme e proposishon lo repartí esaki den dos, un ku ta bálido di djadumingu pa djaweps kaminda entre 7’or pa 11’or e zonido máksimo lo ta di 85 desibèl i di 11’or pa 1’or di mardugá maksimal 65 desibèl. Riba djabièrnè i djasabra e zonido máksimo di 7’or pa 1’or di mardugá lo ta 85 desibèl i di 1’or pa 4’or 65 desibèl. Tin un diskushon tambe entre muzik ‘bibu’ i músika ‘mekániko’, segun Minister Camelia-Römer. E persepshon no ta korekto, no tin diferensia i loke ta importante ta kiko ta molostiá e hende. Tantu AMAK komo GMN, ku ta enkargá ku midimentu di zonido, ta di akuerdo ku e problema ta bai pa e zonido ku bo ta midi. Un otro punto masha importante ta pa traha ku zonifikashon si bo ke desaroyá un área di nightlife. Esei segun minister tabata e idea tras di EOP ‘Eilandelijke ontwikkelingsplan’ pa bo desaroyá área di biba, krio di bestia, área di konservashon, industria i portuario. Minister Camelia-Römer ya ta den kontakto tambe ku abitantenan ku tin molèster ku zonido i òf otro sirkunstansianan ku tambe tin ku ser katalogá komo molèster. A hasi menshon di entre otro papiamentu duru parti pafó di establesimentunan, tira sushi den kurá di bisiñanan, oriná riba kaya, ponementu di fever den área di Saliña i asina por sigui menshoná. Ku esaki e minister kier a enfatisá ku tin hopi elemento ku no nesesariamente ta inkluí músika ku por pone ku ta sea ninga un establesimentu òf un organisadó di evento un pèrmit. Tur hende mester tene na konsiderashon ku ora bo ta hasi un aktividat, bo por stroba otro hende su trankilidat. Punto di salida ta ku e aktividat i e trankilidat mester por haña un kaminda ku nan ta kombibí ku otro. Meskos ku e músiko por gana su pan di kada dia, meskos e abitante tin e derechi di deskansá pa otro dia di trabou.