WILLEMSTAD.- Ayera nochi tempran e delegashon di Excel Arts Academy a regresá Kòrsou despues di a bai risibí e galardon ‘Appeltjes van Oranje’ for di man di su ekselensia Reina Maxima na palasio Noordeinde na Den Haag, Ulanda.
'Appeltjes van Oranje' ta konsistí di tres apel, otorgá na 3 organisashon ganadó. No ta tur e apelnan tin e mes tamaño. Entre nan tin ‘De Grootste Appel’ ku ta esun di mas grandi ku ta bai na e organisashon ku a bria mas tantu i ku su trabounan a resaltá mas.
Entre e tres organisashonnan ganadó, 'Excel Arts Academy' a resultá e ganadó máksimo di prestigioso premio aki
E logro aki ta un onor pa e akademia i tambe algu grandi pa Kòrsou kompletu i e hóbennan di Excel Arts Academy.
Na nan yegada ayera nan a keda risibí pa un grupo grandi di miembronan di Excel Arts Academy i tambe nos Promé Minister, Sr. Eugene Rhuggenaath i Minister di Hustisia, Sr. Quincy Girigorie kende tambe ta un dje miembronan prominente di ‘Excel Arts Academy’.
E delegashon ku a biaha pa Ulanda na yega  a hasi entrega di e galardon na e direktor dje akademia, Shelomi Doran Bakhuis. Un pabien na e organisashon ‘Excel Arts Academy’ i nan direktor ku na aña 2000 a inisiá ku e akademia.
Riba foto nos por mira momentu di entrega di e galardon i tambe e grupo ku a bin risibí e delegashon.