KRALENDIJK — E parti
internashonal ta un torneo ‘Billfish
Catch and Release’ torneo,
den kual a partisipá 29 yate,
prosedente di Aruba, Boneiru,
Kòrsou i Venezuela, un
adelante kompará ku 2016, ku
a konosé 27 yate. Aña pasá
tabatin 59 release kompará ku
e aña aki 34 release. E parti
lokal a konosé un bahamentu
di e kantidat di partisipante.
Ocho boto so a partisipá. E
torneo lokal su meta ta pa
piska pa konsumo lokal. E
piskadó ta keda doño di su
piská.
Internashonal
Den e kategoria ‘Catch and
Release’, e yate Paso Largo di
Kòrsou tabatin e promé release
djabièrnè 35 minüt despues ku
as a bai laman. Den e torneo
aki e piskadó ta saka un portrèt
di e piská banda di e yate,
usando un kódigo ku kamber
di kontròl a duna, ya asina
hurado por kontrolá si e portrèt
ta original i e fecha, kódigo i
ora, ta kuadra ku otro.
Balaú baster i balaú blanku ta bon pa 150 punto kada un,
balaú Cora ku ta mas grandi i
robusto ta bon pa 300 punto.
Si logra piska un balaú riba
300 liber, tin mag di tres’é tera,
loke ta duna e piskadó punto
adishonal. Un mònster di 803
liber, loke ta rekòr Antiano, ta
nesesario pa bai ku e premio
mayó, ku ta un pikòp Ford.
Tres yate tabatin 900 punto.
Promé premio a bai pa Naira
di Aruba ku a logra e kantidat
di punto aki djasabra
traimèrdia. Naria tambe a bai
ku e premio pa e promé release
djasabra, 39 minüt despues ku
as a bai laman. Paso Largo,
ku solamente e kapitan i 1
piskadó, djabièrnè i 2 piskadó
djasabra, a yega e kantidat di
900 punto 2 ora despues di
Naira, loke ta bon pa e di 2 lugá.
Iliza di Aruba, konsistiendo di
solamente hende muhé komo
piskadó, tabatin di 3 premio den
su man, te ora ku Tara di
Aruba a logra mèldu un strike
1 minüt promé ku tempu pa
piska a kaduká i a sòru pa release
e balaú dentro di 14
minüt. Asina aki Tara a bai ku
di tres premio. E yate Grace
tabata e úniko partisipante den
e kategoria lokal ku a partisipá
ku bela i usando un motor ku
pènel solar. Algu sigur bon pa
medio ambiente.
Dean Hendricks di Le Grand
Blue di Boneiru a trese tera un
mònster buní álfashi di 44 kilo,
ku esaki el a gana e premio di
tuna mas grandi.
Lokal
E torneo lokal a konosé
ménos partisipante ku pasado.
Fatima ku Andy komo piskadó,
a gana promé premio den e
kategoria riba 17 pia, ku un
total di 55 piská, bon pa 108.5
kilo, miéntras ku Giordano, ku
Giordano komo piskadó, a trese
9 piská, bon pa 41 kilo i nan a
bai ku e di tres premio.
E siguiente den e kategoria
aki tabata My Sugar Twins ku
Salomons, ku a trese 1 piská
ku tabata pisa 3 kilo, ku no
tabata sufisiente pa klasifiká
pa premiashon. Polar a duna
un kaha di serbes pa e esfuerso
hasi.
Den e kategoria bou di 17
pia, tabata Kuna, Randolph i
Tino, ku a trese 77 piská, bon
pa 86 kilo, ku a bai ku e promé
premio. No tabatin mas boto
ku piská den e kategoria aki.
Ambiente
Anochi e ambiente tabata
tremendo atrobe, ku bufèt
diferente kada anochi i ku
músika di RPM Live i ESO.
Djasabra a klousurá e evento
ku un ‘boat-party’.
Napa ABC Group i It Rains
Fishes tabata spònser mayó di
e torneo. Naturalmente un
torneo di un magnitut asin’aki
no por tabata posibel sin e
siguiente spònsernan, Best
Brands Bonaire/Polar,
Akkermans Auto Supplies,
Luciano’s Ice Cream , Bonaire
Tobacco and Liquor Store, MCB
Bonaire, Rocargo, Bonaire Affair,
Caribbean Laundry Services,
Stone Crusher, Don
Andres, TCB, Vinnie Designz St.
Augustine FL, Shipyard Dog St.
Augustine Fl, Bonaire Nautico
Marina, Bonaire Marine Center,
Budget Marine i Window Wizard.
Por haña e lista kompleto di
resultado riba:
www.bonairefishingtournaments.com.