WILLEMSTAD.- Kada dos aña Kòrsou ta esenario pa ‘Plein Air Curaçao’. E promé edishon tabata na aña 2011. Debí na e éksito rotundo di e añanan anterior, Art Foundation Curaçao ta organisá ‘Plein Air Curaçao International Art Festival’ pa di 5 biaha. Durante e festival artistanan lokal i internashonal ta pinta i finalisá nan pintura den un seshon so. E tema di e aña aki ta ‘Plein Air Curaçao celebrates 5th edition (10th year anniversary)’. Durante e siman di 14 pa 23 di mart artistanan lo pinta rònt Kòrsou di ost te wèst. Si bo ta drumí na playa, bula den laman òf subi un seru e artistanan lo kapturá loke nan ta wak na Kòrsou. Mas o ménos 25 artista internashonal lo bishita nos isla den siman aki pa pinta huntu ku nos artistanan lokal. Riba e delaster dia di e festival, djasabra 23 di mart, lo tin un kompetensia di pintamentu den Punda, Otrobanda i Skalo. Tur interesado (tinèr i adulto) por inskribí for di awe na Art Foundation Curaçao Gallery na Hanchi Snoa 27, Punda, pa partisipá i gana premionan balioso. Pa muchanan di 4 pa 12 aña lo tin un área pa pinta den e asina yamá 'Kiddies Corner’ den Parke Wilhelmina. E aktividat aki ta grátis. Huntu ku esaki tambe lo tin un presentashon di un skol di músika hóben yama Kòrsou ‘A La Belcanto’ guia dor di Anne Aalse. Tur dia lo por atmirá pinturanan di artistanan lokal i internashonal den e Gallery ku lo ta habrí di 9 or di mainta te ku 6 or atardi.