Nos hungadónan ta stèns riba un públiko bibu

 WILLEMSTAD.- Un luna despues di e empate na sero gol den Estadio Alejandro Morera Soto na Alejuela, Costa Rica, selekshon di futbòl di Kòrsou i Costa Rica ta kla pa topa otro. Esei ta awe nochi den Stadion Ergilio Hato aki na Kòrsou.

E partido importante aki ta pertenesé na Grupo D di Liga A den Concacaf Nations League.

Di kon e wega ta importante? Un viktoria ta pone Kòrsou den e final di Concacaf Nations League di yüni 2020, miéntras ku kualke otro resultado ta pone Costa Rica den e ‘driver’s seat’ pendiente e último wega dje grupo (17 novèmber).

Un luna pasá tabata e kipernan Eloy Room i Keylor Navas kendenan a hasi gran trabou i a tene nan arko limpi.

Room a salba na algun okashon, miéntras ku Navas na tres akshon a para loke mester a bira un gol. Pero e kiper di Paris Saint-Germain no tei awe i komo tal no tin ripitishon dje bataya entre di nan dos.

E situashon aki lo ta na fabor di Sontje Hooi ku tin 2 gol den e torneo i tambe dje rumannan Juninho i Leandro Bacuna kendenan tin hamber pa skor. Pero Costa Rica ketu bai por konta riba un kiper ku eksperensia manera t’e kaso ku Esteban Alvarado i un defensa yená ku hèmbernan di eksperensia.

Den e promé partido Costa Rica tabatin poseshon dje bala durante 56%  dje partido. Pero un punto kardinal, ta e echo ku Kòrsou no sa pèrdè na kas.

Kòrda ku e partido ta programá pa 19:30 (mitar di ocho).

...Ricardo Blanco di Costa Rica i e yu di Kòrsou Elson “Sontje” Hooi ta bringa e bala dia 13 di òktober último na Costa Rica...

 Rèfrinan pa e wega:

Ref: Marco Antonio Ortiz Nava (México)

Linesman1: Pablo Isreal Hernández Luna (México), Linesman2: José Ibrahim Martínez (México)

4th Official: Oscar Macías Romo (México).

Historia di weganan Kòrsou v/s Costa Rica

 * E wega di awe ta bira e di 23 partido entre selekshon nashonal di Kòrsou (inkluso: Antia Hulandes) i Costa Rica. E sentroamerikanonan a gana na 14 okashon (46 gol), Kòrsou 4 biaha (21 gol) ku kuater empate.

* E dos ekiponan a empatá 0-0 dia 13 di òktober 2019 den Estadio Alejandro Morera Soto (Alajuela). Den e wega ei, Costa Rica tabatin 56% poseshon di bala.

* Awe ta bira e di shete biaha ku e dos selekshonnan ta enfrentá otro aki na Kòrsou. Promé ku awe, tur dos pais tin dos viktoria, Kòrsou ku 7 gol i Costa Rica ku 6, i tambe dos empate. E último biaha ku e dos paisnan a topa otro aki na Kòrsou tabata riba 3 di yüli 1988, un wega amistoso ku Kòrsou a gana 1-0.

* E viktoria di mas grandi di Costa Rica riba Kòrsou ta 2x 6-0. E promé den wega di kualifikashon pa Kopa Mundial riba 29 di mart 1961 na San José. E di dos tabata den kampionato di Concacaf na Guatemala riba 28 di mart 1965.

* E triunfo di mas grandi pa Kòrsou riba Costa Rica tabata 4-1 den Kampionato Sentroamerikano i di Karibe na Guatemala City, riba 20 di mart 1948.

* Topskorer di Kòrsou den Concacaf Nations League: Sontje Hooi (2).

* Kiper Eloy Room di Kòrsou kende a konta ku gran ‘performance’ den Gold Cup, den Concacaf Nations League a para 10 tiru riba gol den e dos weganan kontra di Haiti i tambe 2 tiru di Costa Rica luna pasá.

* Rangelo Janga tabata e hungadó ku mas tiru den e wega kontra di Costa Rica (3).

* Brandley Kuwas ta e hungadó di Kòrsou ku a sufri mas tantu foul den Concacaf Nations League (9).