WILLEMSTAD.- Despues di Festival di Tumba a surgi dos reklamo ku ta relashoná ku e tema di ‘derechi di outor’. E promé ta e reklamo di MC Pester via di un komunikado kaminda e ta indiká ku tin paresido entre un komposishon di dje i e tumba ganadó ku a keda komponé pa Darwin Gregg. E di dos ta e loke e último dos dianan a bira un punto di diskushon ta e reklamo di Ike Jesurun kaminda e tambe ta indiká ku e tambe ta hasi reklamo riba derechi di outor pa loke ta e tumba ganadó. Den un investigashon ku ‘DEN E BEMBE’ a hasi ta resultá ku e reklamo di MC Pester e mester bin ku e pruebanan dilanti mirando ku segun su vershon ta trata aki di un komposishon ku a keda publiká riba un CD ku a subi merkado na 2002. E pruebanan di similaridat mester subi mesa, anto esaki no a sosodé ainda. Pa loke ta e reklamo di Ike, si bo a yuda di forma signifikante den letra dje tumba dikon dia di inskripshon esaki no a keda poné riba e formulario di inskripshon. Ba tuma nota ku no a hasi esaki, ora ku a entregá letra atrobe e nòmber di Ike no a keda poné, niun reklamo no a drenta. Festival di Tumba a tuma lugá, kantante a presentá, henter e siman ei e reklamo no a wòrdu hasí te pa hasi korekshon por ehèmpel riba e djabièrnè di final. Awor ku e komposishon a resultá e komposishon ganadó direpente Ike ta bin dilanti. Awor mester keda probá ku e kolaborashon di Ike tabata asina grandi ku e mester risibí menshon komo ko-outor dje tumba ganadó. Tumando na konsiderashon tur loke ku tin riba mesa aworakí, e ko’i no tei bira nada!. Si ‘DEN E BEMBE’ ta robes, tempu lo demostrá!.