WILLEMSTAD.- Djabièrnè mèrdia, ku buelo di Copa Airlines, CM288, pa 10 pasa di 12,          lo yega Kòrsou, e legendario kantante Wladimir Lozano i su señora esposa, invitá pa Super Orkesta Karimbo, pa su presentashon den Gala di Bolero 2, ku lo tuma lugá, djadumingu 28 di aprel, di 4 or pa 9 or di anochi den e Sala Multifunshonal PWFC.
Despues di sali for di Aeropuerto Hato, Wladimir Lozano, kompañá pa Crew organisadó di e Gala di Bolero 2, lo pasa na Churromania, den Sambil, pa un ‘Meet & Greet’ ku Prensa i tambe fanátikonan lokal i kompatriotanan venezolano, kendenan tin oportunidat, pa topa i saludá e legendario kantante, konosí komo kantante di Dimensión Latina, tambe La Salsa Mayor huntu ku Oscar de Leon, kaminda nos propio Enrico Henriquez tabata riba piano.
Super Orkesta Karimbo, huntu ku Wladimir a prepará un tremendo presentashon ku un repertorio amplio, ku lo bai trese hopi nostalgia, di e dushi époka di bolero.
Tambe lo tin presentashon di un elenko di 15 kantante lokal kompaña pa Super Orkesta Karimbo, ku ta Michael Boncouer, Carlos Salsbach, Max Henriquez, Ompi Stefania i Romeo Heye, kendenan banda di nan presentashon lo kanta Duo, tambe ku Wladimir Lozano.
Tambe lo tin presentashon di Herbert Martina, Grensly Raphaela, Farley Lourens, Sonny Real, i nos legendarionan, Dennis Cicilia, Wini Poulo, Harold Diels, Wilbert Petronella, Anthony Pieter i La gran dama de la canción, Doña Mafalda Minguel.
Super Orkesta Karimbo, ta invitá fanátikonan, pa e enkuentro na Churromania, na Sambil, ku lo dura un ora, i kaminda por tin hopi sorpresa pa esnan presente.