WILLEMSTAD.- E leyenda yu di Kòrsou, Jandino Asporaat a yega Kòrsou. Jandino ta na Kòrsou spesialmente pa ‘Caribbean Combo’, un show di komedia ku riba dianan 5,6 i 7 di yüli lo keda presentá na Lanthuis Brakkeput Mei Mei. Huntu ku Jandino lo tin presentashon tambe di Roué Verveer, Howard Komproe i Murth Mossel, nan tur huntu bou dje nòmber ‘Caribbean Combo. Karchinan pa djasabra, 7 di yüli a kaba i ta algun karchi a sobra pa e presentashonnan awe, djaweps 5 di yüli i mañan djabièrnè 6 di yüli 2018. Siman pasá nan a sera nan tour na Ulanda ku dos presentashon ‘sold out’ kaminda 8000 persona a bishitá nan presentashon den ‘Afas Live’, loke a bira un rèkòrt, debí ku nunka promé un grupo di komedia na Ulanda, ku artistanan karibeño a ‘sold out’ un sala dje grandi ei. E kuater artistanan ta kla pa pone Kòrsou aribabou. ‘E show aki ta un fiesta grandi’, asina Jandino a indiká. ‘Caribbean Combo’ ta un meskla eksklusivo di ‘stand up comedy’, teatro, músika i baile. Na 2010 nan a duna nan promé presentashon ‘Daar zal je ze hebben’, ku dos presentashon ‘sold out’ na Kòrsou. Ku nan presentashon ‘Ze zijn er weer’ nan ta bolbe pa konkista kurasonnan na Kòrsou. Manera indiká e presentashonnan ta tuma lugá na Lanthuis Brakkeput Mei Mei i tur show ta kuminsá pa 8’or di anochi. Karchinan ta optenibel na Fun Miles, van den Tweel na Jan Thiel i Zeelandia i na Mensing’s Caminada. Kòrda ku djasabra, 7 di yüli a ‘sold out’!.