WILLEMSTAD.- Ayera nochi trempan a tuma lugá e estreno di ‘Kurason di un Pueblo’, e pelíkula di Karnaval di Kòrsou.

E proyekto di Coridja Stars Productions bou di direkshon di Dolph van Stapele a keda estrená ku un sala yen di invitado na The Movies, Scharloo.

Fo’i trempan invitadonan, embahadornan di Karnaval i spònsernan a topa na The Movies pa disfrutá dje estreno di ‘Kurason di un Pueblo’.

‘DEN E BEMBE’ a sinta i disfrutá di un tremendo pelíkula ku tabatin tur ingrediente di nos Karnaval. E produkshon sinematográfiko a presentá tur skina dje selebrashon di Karnaval di Kòrsou.

Ku suptítulo na ingles, e pelíkula ta relatá e historia i inisio di Karnaval na Kòrsou, nos Festival di Tumba, a duna un bista di aserka di kon ‘Hats off to Dreams’ i tambe ‘Estreno di Pikete’ i ‘Estreno Mas Pikete’ ta produsí, presentá i partisipá na Karnaval di Kòrsou.

Na final dje presentashon ‘DEN E BEMBE’ a kombersá ku Corrine Djaoen Genaro, presidente di Coridja Stars Production i alabes produktor dje pelíkula. ‘Mi ta hopi kontentu. Nos a risibí hopi bon reakshon. E tabata hopi difísil pa skohe for di ki ángulo bo ta bai presentá Karnaval di Kòrsou pa bo tin un bon produkshon, esaki prinsipalmente si bo idea ta pa hib’e riba plataforma internashonal. Pa skohe loke ta bai tabatin su pida traba kuné. Tabatin hopi kos ku bo mester a bai pa profundo, pero a skohe pa kue un tiki di tur. E parti emoshonal mester a bin dilanti pa laga bu sinti e dedikashon ku ta traha kuné’, asina Corrine a splika.

1 LUNA

Na Kòrsou, e públiko por disfrutá 1 luna largu dje presentashon na The Movies. Minister di Enseñansa a indiká ku e ke sinta na mesa ku Coridja Stars Productions pa wak e posibilidat ku tur skol na Kòrsou por mira e pelíkula.

PROMOSHON

Minister di Ekonomia a indiká ku e ta interesá den un sipnosis dje pelíkula pa por usa esaki durante di tur mishon ekonómiko ku Kòrsou bai hasi den eksterior.

INTERNASHONAL

Pa otro siman e pelíkula lo keda estrená na Aruba i den luna di aprel lo estrená esaki na Hulanda i St. Maarten. Den luna di aprel ‘Kurason di un Pueblo’ lo keda presentá durante di e di 50 edishon di Rotterdam Film Festival.

KARIBE

Un dje personanan ku a keda impreshoná ku ‘Kurason di un Pueblo’ ta Ssra. Eloise van Wickeren, Film Commissioner di Kòrsou. Sra. van Wickeren ta entusiasmá i a indiká ku e ta bai tur su esfuerso pa e pelíkula por keda presentá durante di festivalnan di sine den Karibe.

Finalmente un rekomendashon pa bai wak ‘Kurason di un Pueblo’ i sostené e produkshon lokal.