WILLEMSTAD- Ora e nòmber Maluma zona  hopi ta esnan ku sa mesora ta kua artista. Maluma ta un strea ku a kuminsá bria sin fin i ku tin masha hopi fanátiko. E ta di orígen Kolombiano i ta konosí pa e hit “Felices Los Cuatros” ku hasta Marc Anthony a kue e piesa ki hink’e den un bachi di salsa.

Maluma djadumingu awor tin un konsierto planiá pa presentá na Roma. A bin bira konosí ku esnan ku ta tras di e konsierto aki a disidí ku ta para e konsierto pa motibu di benta di mas di karchi. E konsierto aki mester a tuma lugá na Roma, Italia. E motibu ku nan a bisa ku ta para e konsierto ta pa seguridat.

Tur karchi pa e konsierto aki a keda  bendé, pero di akuerdo ku e promotor di e espektákulo, nan a risibí di parti di outoridatnan italiano e informashon ku mester para benta di karchi na 500 lokalidat otro ku tambe tabata bende karchi pa e konsierto.

Tabata nesesario pa redusí e kantidat di hendenan ku kier bin mira e konsierto, asina e organisadónan a komentá i a agregá ku kanselashon di e entradanan solisitá lo por a trese reakshonnan potensialmente ku riesgo riba dia di e espektákulo.

Por lo tantu nan a konsiderá ku ta mihó anulá e evento pa evitá problema ku asuntu di òrdu públiko. Maluma, di su parti a indiká: "no tabata fásil pa tuma e desishon pa kanselá, pasobra e último kos ku mi no kier a hasi ta desilushoná mi fanatikada di Roma, kende pa basta dia mi kier a aktua nan dilanti".

"Pero tumando na kuenta e problemanan potensial di seguridat anunsiá di parti di outoridatnan lokal, mi a haña mi obligá na kanselá mi konsierto di djadumingu awor na  Atlantico Live di Roma", el a agregá.