WILLEMSTAD.- E organisashon Sterck Events (organisadó di Tabula Rasa) huntu ku Rotary Club Willemstad a uni forsa pa organisá un anochi festivo di Cabaret kombiná ku un área kulinario i entretenimiento musikal pa un bon kousa.
Dia 4 di yanüari 2020, e tereno di e festival Tabula Rasa ku lo tuma lugá dia 3 di yanüari na Fuik Valley na Santa Barbara Beach & Resort ta esenario pa e anochi di “Cabaret Culinair”.
E evento aki ta wòrdu organisá pa asina kuminsá un aña nobo ku un sentido positivo kaminda tur fondo rekoudá lo wòrdu usa pa un di e proyektonan di Rotary club Willemstad.
E konosido komediante Jörgen Raymann ku ya na vários okashon a presentá na Kòrsou i ku ta karga un kurason grandi pa nos isla lo ta e anfitrion di e anochi.
Pa e anochi special aki e lo bini ku 3 komediante for di Hulanda ku niun biaha no a presentá na Kòrsou. Rayen Panday, Anuar i Stefan Pop lo kompartí esenario e anochi aki. “Nos ta sumamente ansioso pa por presentá pa promé biaha na Kòrsou; ta un honor pa nos por habri e aña 2020 ku e pueblo di Kòrsou” segun e komediantenan.
Durante e anochi aki abo komo bishitante no solamente ta kuminsá e aña aportando na un bon kousa pero tambe lo tin 5 “food stations” i kada unu lo trese un eksperensia kulinario úniko. Huntu ku esaki lo tin un “Salentein wine bar” i hopi otro sorpresanan kustumbrá na anochi kulinario. “Cabaret Culinair” sigur ta un garantia pa kuminsá un aña 2020 positivo.
E fondonan rekoudá lo wòrdu atministrá dor di Rotary Club Willemstad. Nan lo sòru pa e fondonan wòrdu aloká na un di e proyektonan ku mas tin mester di esaki. Rotary Club Willemstad ta afiliá na Rotary International i nan ta enkargá nan mes ku servisio na komunidat. Rotary Club Willemstad regularmente ta duna man na vários proyekto òf nan ta duna aporte finansiero.
Pa e Festival di Tabula Rasa ku lo tuma lugá riba 3 di yanüari, FUIK Valley na Santa Barbara Golf & Beach Resort, lo wòrdu transformá den un área di Festival, úniko den su diseño i dekor. E lokalidat lo ta unu ku sigur ta algu bale la pena pa eksperensia.
Entrada pa Cabaret Culinair ta optenibel na tur punto di benta konosí i via di tabularasacuracao.com. E anochi mágiko aki ta kuminsá 18:00 i lo terminá 23:00. Kuminsá bo aña aportando na un bon kousa i djòin dia 4 di yanüari 2020 pa hari, kome, bebe i kompartí un anochi di goso, durante e promé edishon di Cabaret Culinair.