WILLEMSTAD.- Djasabra anochi na Madero Ocean Club na Mambo Beach Boulevard a tuma lugá e promé edishon Latino di ‘Madero Sunsets Festival’ ku presentashon di Maite Hontelé, Rolf Sanchez, Randal Corsen i su banda, huntu ku Arnell Salsbach i ‘La Familia’.
Na promé lugá mester remarká ku e set up dje anochi tabata tremendo, ku stènt di kòktel i stèntnan di kuminda riba bich. E presentashon di dj Jack ku e repertorio perfekto pa e anochi ku a pone e públiko baila promé ku e konsierto mes a kuminsá.
Maite Hontelé i su banda a habri e anochi ku un bon presentashon. E dama trompetista residensia na Colombia a presentá ku su banda i a repasá su karera musikal presentando diferente di su produkshonnan musikal. Na final di su presentashon el a terminá esaki ku un deskarga musikal kaminda diferente di nos músikonan lokal a kompartí tarima huntu ku Maite i su orkesta.
Arnell Salsbach i ‘La Familia’ a forma un tremendo ambiente riba bich ku nan presentashon. E presentashon tabata sublime i e públiko sigur a move for di e tarima prinsipal i a bai para gosa dje presentashon di ‘La Familia’.
Randal Corsen i su orkesta a subi tarima i a duna un tremendo presentashon huntu ku su kantantenan Dibo Doran, Yumarya Grijt i Heinrich Pieter. E banda un biaha mas a zona bon i nan repertorio tabata bon varia pa e públiko presente.
Rolf Sanchez e atrakshon prinsipal dje anochi a keda kompaña pa e orkesta di Randal Corsen. Presentando algun di su éksitonan i tambe algun ‘cover’, e kantante a duna un presentashon ku a kai na agrado di e públiko ku a kanta i baila durante su presentashon.
Rolf mes a duna un bon presentashon, pero no a impreshoná ku su kanto na konsepto di ‘DEN E BEMBE’. Ora bo skohe pa bo kanta ‘covers’ di Luis Enrique i Marc Anthony bo mester ta bon para den bo sapatu. Nos punto di bista ta ku sea e kantante tabatin problema ku su stèm djasabra anochi òf su ‘range’ no ta dje haltu ei.
Madero Ocean Club definitivamente por mira atras riba un tremendo evento. E públiko sigur a keda enkantá i ta pendiente pa e siguiente edishon Latino di ‘Madero Sunsets Festival’.