WILLEMSTAD.-  TicketsCaribbean.com, empresa dediká na benta di karchi ‘online’ pa eventonan den Karibe i Qube Entertainment a uni forsa pa presentá e promé Festival Internashonal di Músika i Humor Latino na Kòrsou, dia 3 di novèmber próksimo den ‘Sambil Event Square’.
E mishon di TicketsCaribbean.com i Qube Entertainment ta di krea un evento di kalidat internashonal kaminda artistanan konosí di humor i muzik latino por presentá riba mesun tarima aki na Kòrsou. E festival ta primintí pa entretené e públiko lokal i e turistanan ku ta bishitá nos isla ku un anochi yená ku komedia i músika pa hari, baila i gosa.

Artistanan Internashonal:
Alejandra Azcárate ta un aktris kolombiana ku un trayektoria di mas ku 8 aña den ‘stand-up comedy’ i kasi 1500 presentashon riba tarima na Suramérika, Nortamérika i Oropa. Alejandra Azcárate a posishoná su mes ku un stail marka pa elegansia i glamour, ku un bon imágen riba tarima i un humor sofistiká yena ku ingredientenan pika.

Laureano Márquez ta konosí na Kòrsou pa su trabounan den e programa di televishon Radio Rochela i na nivel internashonal komo un humorista i politikólogo venezolano ku ta usa skèchnan satíriko pa hasi bofon di polítikonan. Laureano a desaroyá un karera humorístiko fundamentalmente den teatro, den obranan ku a kibra rekòr di takia i ta hasiendo ‘stand-up comedy’ riba tarima rònt mundu.

Alejandro Riaño ta un aktor i komediante kolombiano, rekonosé pa krea i protagonisá espektákulonan di ‘stand-up comedy’ i pa su papelnan den teatro i mas resien den sine kaminda el a aparesé den pelíkulanan manera ‘Malcriados’ i ‘Todas para uno’. Debí na e éksito ku Alejandro a logra aña pasá den e ‘Show di Humor Latino’ na Kòrsou, e promotornan a invit’é, pero e biaha aki komo anfitrion i invitado spesial pa e festival.

Pakole ta ser konsiderá komo un dje kantantenan di Salsa Dominikano mas skucha na República Dominicana. Su siguidónan konosé pa e éksito ku e tabatin ku e kansion ‘Le hace falta un beso’ i pa su ‘single’ nobo titulá ‘Besos’ den kolaborashon ku Bulova. Esaki lo ta su promé presentashon na Kòrsou i lo e keda kompaña pa e orkesta di Salsa, ‘Curaçao Banda Show’.

Orario
‘Show di Humor Latino’ ta kuminsá pa 8 or di anochi i terminá 11 or ku presentashon di Alejandra Azcárate, Laureano Márquez i Alejandro Riaño.
‘Show di Músika Latino’ ta kuminsá pa 11.15 di anochi i terminá 3 or di mardugá ku presentashon di Pakole, Curaçao Banda Show i dj-nan invitá.

Karchi
Karchi general ta kosta 75 florin i VIP ta kosta 150 florin i ta optenibel na Mensing’s Caminada, Beep Beep, Polo Club (Punda) i Polo Club (Sambil).
Despues di 11’or di anochi lo bende karchi solamente pa e konsierto di Pakole i Curaçao Banda Show na rason di 35 florin.