WILLEMSTAD.- 'All You Can Art', e proyekto di Instituto Buena Bista (IBB) i Kunsthal Rotterdam, a risibí e premio & Award durante di e konferensia 'Beeld & Storm' riba 10 di Desèmber 2018 na Ulanda.
E &Award ta un premio otorgá na un organisashon ku a tuma medida (i logra) pa hasi e sektor kultural i kreativo mas inklusivo. 'All You Can Art' ta e promé proyekto den historia pa risibí e premio aki.
Presidente di hurado Noraly Beyer ta nota: "Tur hende ta haña un chèns pa partisipá, traha arte i diskubrí huntu durante di All You Can Art. Aktividatnan manera e 'summerschool', eksposishon, studionan, 'think tanks' i drenta den barionan ku arte a hasi un impakto enorme. Dor di esaki e ta gara e ròl sosial den e área di diversidat i inklushon na un manera ekstraordinario".
'All You Can Art' a kuminsá na 2016 komo un kooperashon entre IBB i Kunsthal Rotterdam komo forma nobo di ekspresá e mishon di IBB. E a sigui krese i evolushoná kada aña despues di esei. Tumando lugá den e sala di mas grandi di e museo e eksposishon i proyekto sosial ta un kombinashon di studio di artista, 'summerschool', proyektonan sosial i e 'vibe' di IBB den Rotterdam.
Personal di IBB, alumnonan i artistanan ku a yega di ta di residensia na IBB ta forma núkleo di e eksposishon i nan tin studio kaminda nan ta traha den e sala, i tambe na e proyektonan na e sitionan sosial. Bishitantenan di e museo i pues e eksposishon ta liber pa partisipá ku kualke un di e proyektonan ku ta tuma lugá durante di e eksposishon; for di traha huntu ku e artistanan te na traha riba un pintura mural, o partisipá den e diferente 'Think Tanks'.
E partisipantenan di e 'summerschool' ta eksperensiá e manera di traha dor di un kurso kaminda nan ta traha huntu ku e artistanan den e museo, pero tambe riba lokalidat durante di diferente proyekto sosial.
Durante di 'All You Can Art 3' na 2018 OpenRotterdam a traha un kolekshon di reportahe visual riba e eksposishon i su proyektonan sosial. Pa mira e totalidat aki por fabor bishitá e siguiente lenk: https://goo.gl/8RFxTt
E premio aki ta un logro remarkabel den IBB su búskeda pa hasi arte mas aksesibel i mas relevante na un parti mas grandi di nos komunidat.

'All You Can Art' lo ta bèk durante di 2019.