WILLEMSTAD.- Kòrsou su di dos partisipashon den e torneo Gold Cup a yega na su final. E bunita soño ayera nochi a keda interumpí na momento ku Korsou a kai ku skor mínimo di1-0 kontra di Merka den partido ku a keda hungá den Lincoln Financial Field na Philadelphia.

Selekshon nashonal di Korsou sigur ta regresá kas ku kara na laria, ounke klaro ku e sentimentu ku por a logra mas. Korsou ayera nochi a hunga un wega bastante kuidadoso, sin riska masha i a logra baha e ritmo di wega dje ekipo norteamerikano. Pa e motibu ei no ta nada straño ora ku mira e sifranan ku ta indiká ku Korsou tabatin 53% di poseshon di bala, tambe 13 tiru riba gol kontra 11 di Merka i 426 pase korekto kompará ku 404 di e ekipo di kas.

For di den e promé minütnan por a tuma nota ku Korsou a opta pa un sistema kaminda ta evitá wega na un ‘speed’ hopi haltu, loke sigur no a kai na agrado dje publiko. Pero ta hasiendo esei ku tabata buska burakunan. E gol merikano tabata kologá den laria i el a bin kai riba un kruse ku ta keda di kop pa Weston McKennie, sin ku kiper Room por a reakshoná.

Den di dos tempu e bala a hunga muchu mas tantu via pianan di Korsou i a surgi algun disparo, entre kua un ku etiketa di gol di Bacuna. Pero e kiper merikano den tremendo bulada ta tene su arko limpi. Manera ya ta e kustumber di Korsou, den e minütnan final a pone mas preshon pero ya tabata demasiado lat.

E situashon:

Den otro weganan di wikènt último Haiti a sorprendé Canada ku skor di 3-2, miéntras ku Mexico a gana di Costa Rica na penalty, despues ku e partido a finalisá den empate na 1 gol.

Jamaica a derotá Panamá ku skor di 1-0 i den semi final ta bai topa Merka den semi final riba djárason 3 di yüli.  E otro semi final ta bai entre Haiti i Mexico mayan anochi.

Leandro Bacuna ta bringa e kueru ku un hungadó di Merka. Bacuna a yega hopi serka di un posibel gol di empate, pero kiper a desviá su tiru.

Leandro Bacuna den pelea pa e bala. Bacuna tabatin un bon tiru den inutnan final, pero e kipper merikano a defendé bon riba dje.