WILLEMSTAD.- E aña akí e gran kantadó di tambú Tela ta a la karga atrobe.
Den sinku komposishon nobo René Rosalia ta trata situashonnan penoso i inhustu ku trahadónan i pueblo di Kòrsou mester a soportá den aña 2017.
Tela ta e figura popular literario di pueblo ku dr. Rosalia a krea den añanan nobenta di siglo pasá pa vosiferá dolónan di pueblo. E aña akí Tela ta kanta 5 kantika ku ta ilustrá e situashon penoso i di abuzu di e último dékadanan aki na Kòrsou.
Riba e ilustrashon ku ta kompañá e artíkulo por mira Tela bon rabiá den kòntròl di karni den supermarket. Un tal Ròni a yama Tela i el a disidí ku e ta bai yuda Ròni den kòntròl di karni.  Otro piesa ta “Gobièrnu danki” kaminda Tela ta “gradisí” mandatarionan pa e “tremendo” gobernashon ku nan ta hibando. E ta gradisí nan ku no a subi suèldu mínimo i ku a pak nan ku un subida di belasting di outo ku 13.5 %. E ta gradisí nan tambe pa e echo ku nan a bolbe tapa kara pa asuntunan dudoso den UTS.
“Itu no ke” ta trata e echo tristu ku minister i FKP ta trapa derecho di e siudadanonan ku ke kumpra e kas di pueblo ku nan ta biba den.
“Wandón Zènròn” ta un análisis di e yegada ku masha tamtam di kapitalistanan chines na Kòrsou. Tela ta señalá ku atrobe Kòrsou ta kai chikí.
Ku e kantika “Den Lei” Tela ta mustra ku na Kòrsou ta apliká lei di trèktu i ku tin un grupitu di hende ta biba riba lei. Kiko ku nan hasi òf laga di hasi lei no ta riska mete ku nan.
E CD ta konsistí di 9 kantika i ta optenibel na Libreria Mensing i serka dirigentenan di Museo di tambú Shon Cola. E numbernan pa hasi pedido ta 696-3204; 690-5721 i 697-2199.
E CD ta karga e lema: Un pueblo informá ta un pueblo ku defensa.