WILLEMSTAD.- Manera tur aña di nobo pa vários aña kaba, DOME, e tùnel di ambiente, manera e lo wòrdu identifiká den 2019, lo ta presente den Karnaval 2019. E aña aki DOME a bai un tiki mas pariba direkshon Palu Blanku i bai stashoná su mes dilanti di SAMIRA building. Mas grandi pa akapará mas públiko i sigur akomodá nos turistanan ku kada aña ta subi na kantidat. Na 2018 e DOME a demostrá un biaha mas ku e ta e sentro di ambiente pa gruponan i sigur e públiko ku a yena e DOME manera nunka promé i ‘sold out’ tur asiento i espasio disponibel.
Pa e motibu aki den 2019 a disidí ku ta hasi e Tùnel di ambiente “DOME” mas grandi i alabes tur 2 banda di kaya formando e Tùnel di ambiente mas dushi i mas grandi di Kòrsou.

E aña aki a restrukturá e sistema un tiki mirando ku kada persona ta diferente i enfokando mas riba e famia kompleto. E aña aki un biaha mas e atrakshon prinsipal pa tur famia ta keda e “oppas” pues “Child Care” ku lo ta presente, brindando asina kada mayor e posibilidat pa laga nan yu(nan) di 3 pa 10 aña bou di kuido profeshonal miéntras nan mes ta gosa un par di meter mas leu di E fiesta kultural mas grandi di Kòrsou, sin molèster di zonido, solo, stof òf áwaseru, ya ku e muchanan aki tur lo ta den un área ku airco, entretenimento, kuminda i hopi importante kuido profeshonal promé i durante di e marcha. Tambe e parkeo ku seguridat i transporte pa i for di e Tùnel di Ambiente ta inkluí manera ta kustumber.
Ambiente manera tur aña ta garantisá, ku regalonan di TDS, entretenimento i muzik. Bar i kushina di mes ta bon surti ku diferente kos dushi optenibel na preisnan pa tur hende su saku. “DOME” lo ta operashonal djabièrnè di parada di Tiener den un forma limitá, djadumingu di Gran Marcha i djamars di Marcha di Despedida full.
E apertura ofisial di e e Tùnel di Ambiente lo bai ta djabièrnè dia 1e di mart 2018 pa e parada di Tiener. Lo bai tin un sorpresa grandi riba e atardi/anochi aki presente pa deleitá tur e hóbennan presente, sperando riba yegada di e parada i di mes e shownan bunita bou di efektonan di lus i huma di e gruponan bou di e DOME.
Imágennan di e gruponan pasando den “DOME” lo wòrdu transmití gratuitamente pa Mundu kompleto pa CCGG, ku narashon den 4 idioma via di nan página wep i pa miembronan di TDS esaki tambe lo ta disponibel riba e kanal di “DOME“ kual ta kanal 73 HD, grátis.
Preisnan pa nos Tùnel di Ambiente ta: Pakete di djadumingu i djamars 200 florin; Karchi lòs pa un di e 2 dianan 125 florin. Tieners Parade 25 florin; Day Care (3-10 aña) 75 florin pa dia (solamente djadumingu i djamars) i VIP (mesa pa 4) yama 528-2244 pa reservashon.
Karchinan pa e Tùnel di ambiente aki ta disponibel na: Van den Tweel Zeelandia òf Jan Thiel, Bruna, Mensing's, Bottles, Madero Lifestyle Store, 24 uur uit de muur, Beep Beep Rio Canario, TDS Vinik Plasa i si sobra, na entrada di “DOME” òf tambe riba https://www.tibbaa.com

Pa mas informashon i preisnan di e paketenan por subi www.domecuracao.com. Abo lo no ke ta parti di e Tùnel di Ambiente aki tambe? Hasi lihé i buska bo entrada pa bo no mester keda afó!