WILLEMSTAD.- Ayera tardi e organisashon di International Food & Fiesta Festival a tene un rueda di prensa kaminda nan a duna informashon i último detayenan pa loke ta trata e evento ku ta tuma lugá e wikènt aki na Rust & Burgh.
E parke di Rust & Burgh a keda repartí den diferente sekshon kaminda lo tin stèntnan ubiká ku kushina di diferente paisnan ku lo forma parti dje sekshon kulinario huntu ku trùknan di pan i grill ku tambe lo tei presente pa ofresé nan kuminda.
Lo tin kioskonan ku lo ofresé e bishitantenan tur sorto di kosmétika, asesorio, artesania, matanan manera orkidia i ‘tu y yo’. Lo tin un sala di makiahe, salon di uña, workshop di obra di man i diferente otro stènt kaminda empresanan lo ofresé nan servisio. Pa e muchanan tin un tremendo parke di ‘bouncer’ ku weganan di feria pa nan por entretené nan mes.

Entrada
Entrada pa ‘International Food & Fiesta Festival’ lo ta 5 florin pa persona. Dia 27 di aprel e parke lo ta habrí for di 11 or di mainta i djadumingu, 28 di aprel por drenta for di 10 or di mainta.
International Food & Fiesta Festival ta warda pueblo di Kòrsou bin gosa i relahá bou di e palunan fresku di Rust & Burgh.