WILLEMSTAD/COLORADO.- E studiante/atleta di beisbòl yu di Kòrsou Edmond Americaan, a bira kampion di Merka ku su skol Chipola College (Florida) den Junior College (JuCo) World Series djasabra último na Colorado. Americaan su skol a logra un viktoria di 15-6 riba San Jacinto College (Texas) pa asina bai ku e título nashonal pa di dos biaha den historia di e skol.

Edmond Americaan no ta un deskonosí den beisbòl di Kòrsou. Hungando den e organisashon di Sta. Maria, Americaan a bai Williamsport ku selekshon di Little League Liga Pabou. Despues komo parti di e proyekto “Studia den Region” el a bai Merka hungando beisbòl na Trinity Christian Acadmy Highschool. Einan aña pasá huntu ku vários otro pelotero yu di Kòrsou el a guia TCA na nan promé título komo kampion di Florida di nan divishon.

Despues di temporada Edmond Americaan a keda di ‘draft’ pa Arizona Diamondbacks, pero el a opta pa sigui komo studiante/atleta ku su beka na Chipola College. E aña aki e tin e posibilidat pa keda di draft un biaha mas. E draft di MLB e aña aki ta start dia 12 di yüni próksimo.

Edmond Americaan i Chipola College pa logra yega World Series di JuCo mester a gana Palm Beach State College den e final regional. E skol aki tambe ta konsistí di vários pelotero yu di Kòrsou manera Drexler Macaay, Jowenrick Daantje, Swindly Lint i Jerceley Cicilia.

Chipola College ta konsiderá komo un di e potensia nan den JuCo na Merka i vários di e hungadónan di e skol aki ta keda di draft tur aña. Jose Bautista i Russel Martin ta aktual peloteronan den Liga Grandi ku a bai Chipola College.

Edmond a kaba temporada regular ku un averahe di .364 ku ta produkto di 60 hit den 165 turno na bate, ku 8 doblete, 2 tripel i un honron. El a roba 12 base. Extra Deporte lo keda pendiente si Edmond Americaan kai den draft e aña aki atrobe.

EDMOND AMERICAAN