Edsel Dimie, e mihó rèfri di último añanan na Kòrsou

Deporte

Strea Briante di nos Deporte

WILLEMSTAD.- Awe Strea Briante ta dirigí riba un rèfri di futbòl. Ta trata di Edsel Dimie, un rèfri premiá na numeroso okashon. Edsel Dimie a nase riba 19 di febrüari 1961 na Kòrsou. Ta trata di un persona ku ta hunga futbòl i ku ademas di esei, el a disidí na profundisá den e parti di arbitrahe. Su debut komo rèfri tabata den aña 2002 den di dos divishon FFK. Su aña siguiente, durante kampionato 2003/2004 Edsel a optené su diploma komo rèfri. Ya pa e siguiente temporada di 2004/2005 el a kuminsá dirigí weganan di kampionato.

Den kampionato 2005/2006 Edsel a flùit su promé wega den promé divishon. Tabata e partido entre Jong Holland i Undeba.

...Rèfrinan Valentino “Tino” Chance, Edsel Dimie (komo rèfri di aña) i Kevin Pieter...

Edsel ta un rèfri ku hopi kondishon i sin duda ta e árbitro ku últimamente mas a bin ta destaká den kampionato Liga MCB. Loke ku Edsel tin komo bentaha i ku sigur ta yud’é komo rèfri, ta e echo ku e mes tambe a praktiká e deporte di futbòl.

Remarkabel ta e echo ku Edsel na no ménos ku nuebe (9) okashon tabata e árbitro prinsipal den weganan final di kampionato di futbòl di Kòrsou. Tambe el a dirigí tres final di Kopa Antiano.

Tambe Edsel tin den su trayektoria ku el a aktua den final di kampionato 2013/2014 di futbòl di Boneiru. Mas aleu el a dirigí weganan di futsal i futbòl di playa, tantu lokal komo internashonal.