WILLEMSTAD.- Esnan ku konosé kantika manera ‘Bon pa tin den kas’, ‘Boton ta ploi’, ‘Ko’i porko’, ‘Miami’, ‘Tinpú’ i ‘E kilo di Lanto’ for di kabes, ta pasobra nan a wak nan video clip i a skucha e piesanan akí sea riba Facebook òf riba YouTube.

Tur e komposishonnan aki tin un kos komun: nan ta di Edsel “Payo” Juliet, dòkter di dòbel sentido i gran artista den arte di palabra di nos idioma Papiamentu. Edsel Payo Juliet tin un periodo hopi drùk tras di lomba i porfin nos a hañ’é personalmente pa papia kuné.

Payo ta konta ku hopi emoshon di un produkshon nobo ku e ta trahando ariba. E título ta ‘Rèspèt pa kultura’. “For di mi 23 aña te ku awe mi ta toka na Ulanda ku músiko di diferente orígen i nashonalidat manera afrikano, surinameño, chines i vietnames, merikano, chileno i otro latino di Puerto Rico, Venezuela, Colombia etcetera.

Danki na tur ku awe mi konosé mi mes mas mihó. Den mi produkshon nobo Rèspèt pa Kultura, Selma t’ei kibra tur tabú den su videoclip nobo riba un tema mashá importante den nos bida diario. Kos ku den nos bista aki na Kòrsou ta imposibel pa hasi, den otro pais na mundu ta algu mashá normal,” Payo ta konta.

Kiko e kos asina importante ei ta?

Pa nada di mundu Payo no kièr laga esei slep. Pero un kos si ta sigur. E siman aki lo bira é siman di Selma! Kòrsou warda bo kurpa, Selma is Back!!

Zonido i meskla di e produkshon akí tabata kompletamente den man di Albert Windster. Koristanan Mireille Jeije Adelina i Soraida Balentina a sa di duna e produkshon e toke final ku kompositor i produktor Edsel ‘Payo’ Juliet tabata spera.

Tur miembro di Payo su AppClub por pidi e Mp3 di e produkshon nobo na tel. +5999 514 7257. Esun ku no por warda por wak e treiler for di awe riba Facebook, e página di e Fanclub di Payo.

E promé tokánan di Edsel Juliet i la Banda Loca kaminda lo estrená ‘Rèspèt pa kultura’ ta djabièrnè dia 1 di sèptèmber na Café Mahaai, djasabra dia 2 di sèptèmber na Toko Williwood na Willibrordus i djadumingu dia 3 di sèptèmber na Cabana Beach.