WILLEMSTAD.- Edsel ‘Payo’ Juliet tin un produkshon nobo riba merkado titulá ‘Danki Corona’. Nos konosé Edsel Payo pa su produkshonnan chistoso ku ta pone nos hari i gosa. Pero esaki sí a pone nos para ketu un ratu i mesora nos a tuma kontakto ku Edsel Juliet.

Nos a puntra Payo pa splika nos di kon i pakiko el a skohe e título ‘Danki Corona’. Segun Payo Juliet: “Ta fásil. E biaha’kí mi ke pa bosnan skucha letra di e kantika. Sinti boso liber pa interpretá e lokual ku boso ta komprondé i haña di mi komposishon”.

E kantika ta habri ku eksperensia di un hende ku ta konta kuantu bèrgwensa i miedu esnan ku a pega ku e vírus di Corona tin pa papia riba dje. Ta manera kos ku ta un krímen nan a kometé. Nan tin miedu ku lo husga nan i ku hende lo mustra dede riba nan. Den e produkshon akí Payo Juliet ta mustra riba e impakto di e vírus di Corona. Pasobra segun Payo nada no ta sosodé sin motibu. “Corona, b’a pone mundu para ketu”. Payo ta kanta e frase aki dos biaha den su piesa. Pero e ta kanta tambe e kosnan bon ku Corona a siñ’é. I ta pa e motibu ei é, Edsel Payo Juliet, ta yama e vírus di Corona danki.

Payo Juliet ta gradisí su amigunan músiko ku a traha ku hopi amor riba e produkshon akí. Nan ta Eric Calmes, areglo i bas. Igort Rivas, tròmpèt. Dennis Aalse, trombon. Delbert Bernabela, saks. Alexy Montero, guitara i Eric Ignatia, piano. Kantante di koro ta Daisy Janga, Vallery Kuster, Oongh Evertzs i Eric Wijngaarde. Meskla i adaptashon di ritmo tabata den man di Albert Windster.

“Si mi mensahe por yuda habri wowo di un i tur ku a skuch’é, meskos ku el a habri esun di mi, esei ke men ku mi a kumpli”, Edsel ta bisa na final di nos entrevista.