CARACAS, VENEZUELA (AFP).- Algun shen maestro di skol, trahadónan públiko i penshonadonan venezolano a protestá na Caracas pa eksigí oumento di salario i penshonnan, komo tambe pa mihó kondishonnan di trabou, alegando ku nan entrada a keda tapá pa e krísis den e pais.
“Nos ta sperando i eksigiendo un oumento general di suèldu i salario, segun Gregorio Alfonso, presidente di e asosiashon di profesornan di Universidad Central de Venezuela, durante e manifestashon den kapital dje pais.
“Nos ta haña ku awor mester atendé ku nos”, segun Argenis betancourt, un maestro penshonado di 69 aña kende a konta ku den dianan di Pasku el a disfrasá na Papa Pasku pa eventonan pa por tin èkstra entrada i awor e mester bende kuminda pa por sobrebibí.
“Nos no por biba ku tres dollar. Nos ta demandá pa subi e suèldunan pa un penshon digno, segun Rosa Marcano, penshonado di 58 aña.
Aktualmente e salario mínimo mensual ta di 130 bolívar, alrededor di 3.6 dollar den kambio ofisial. Esaki no a oumentá for di mei di 2022, tempu ku e tabata igual na 30 dollar.
Gobièrnu di presidente Nicolas Maduro ku ta kulpa e krísis na sanshonnan internashonal ta komplementá e ingreso ku bónus di 70 dollar, ku no ta sufisiente den un pais ku un dje inflashonnan mas haltu na mundu.